सर्लाही । जिल्लाको ईश्वरपुर नगरपालिका ९ रामनगरमा करेण्ट लागेर श्रीमतीको मृत्यु भएको छ । घटनामा श्रीमान् घाइते भएका छन् ।
रामनगरका राम महतोकी श्रीमती २८ वर्षीया कुसुमदेवी महतोको करेण्ट लागेर मृत्यु भएको हो । चुँडिएर लत्रिएको वाइफाइको तार उठाउन खोज्दा सुरुमा श्रीमान् ३४ वर्षीय रामलाई करेण्ट लागेको प्रहरीले जनाएको छ ।
श्रीमानलाई करेण्ट लागेपछि तार छुटाउन खोज्दा श्रीमती कुसुमदेवीलाई समेत करेण्ट लागेको स्थानीयले बताएका छन् । दुवै जनालाई तत्कालै उद्धार अस्पताल बर्दिबास पुर्याइएको थियो ।
कुसुमदेवीलाई बर्दिबास पुर्याउँदा चिकित्सकले मृत घोषणा गरेको इलाका प्रहरी कार्यालय केशरगञ्जका प्रहरी निरीक्षक मानप्रसाद श्रेष्ठले जानकारी दिए । श्रीमान् रामको भने बयलवासमा उपचार जारी छ ।
प्रतिक्रिया दिनुहोस्
