रगतमा चिनीको मात्रा सामान्यभन्दा बढी रह्यो भने मधुमेह हुन्छ । यो एक खतरनाक रोगकाे सूचीमा पर्दछ, किनभने यसको कुनै उपचार छैन। यसलाई मात्र नियन्त्रण गर्न सकिन्छ।
सन् २०२१ मा जारी गरिएको तथ्यांकअनुसार विश्वभर ५३ करोड ७० लाख अर्थात् २० देखि ७९ वर्ष उमेर समूहका ५३.७ करोडभन्दा बढी मानिस यस रोगबाट प्रभावित छन् । सन् २०४५ सम्ममा यो संख्या बढेर ७८३ मिलियन अर्थात् ७८.३ करोडभन्दा बढी हुने अपेक्षा गरिएको छ ।
स्वास्थ्य विज्ञहरुका अनुसार याे राेग निम्तिनुकाे कारण खराब जीवनशैली र खानपान रहेको छ । यसबाहेक परिवारमा कसैलाई यो समस्या छ भने यो आनुवंशिक पनि हुनसक्छ, त्यसैले धेरै सावधानी अपनाउनुपर्ने हुन्छ।
यसलाई नियन्त्रण गर्न केही उपाय अपनाउन सकिन्छ, जसबारे यहाँ चर्चा गरिएकाे छ ।
१. कार्बोहाइड्रेट युक्त खानेकुरा कम खाने
हामीले खानामा प्रायः तीन प्रकारका कार्बोहाइड्रेट खान्छौं। यसमा स्टार्च, चिनी र फाइबर हुन्छ। स्टार्च र चिनी मधुमेहका बिरामीहरूका लागि बढी हानिकारक हुन्छ, किनभने शरीरले तिनीहरूलाई ग्लुकोजमा परिणत गर्दछ । यिनीहरू प्रशस्त मात्रामा खाँदा रगतमा चिनीको मात्रा द्रुत रूपमा बढ्न सक्छ। यस्तो अवस्थामा यस्ता खानेकुरा नखाएर सुगरलाई नियन्त्रण गर्न सकिन्छ ।
२. राती खाना खाने समय परिवर्तन गर्नुहोस्
राति अबेरसम्म खाना खाँदै हुनुहुन्छ भने गम्भीर समस्याको सिकार हुनसक्नुहुन्छ । राति ढिलो खाना खाँदा मेटाबोलिक समस्या हुन सक्छ। धेरैजसो अध्ययनमा विज्ञहरूले बेलुकाको खाना साँझ ६–७ बजेसम्म खानुपर्ने बताएका छन् । खाना खाएपछि कम्तीमा १०–१५ मिनेट हिँड्नुपर्छ । यसले कार्बोहाइड्रेट नियन्त्रण गर्न मद्दत गर्दछ।
३. शारीरिक क्रियाकलाप गरिरहनुहोस्
यदि तपाईं मधुमेहबाट बच्न वा रगतमा चिनी नियन्त्रण गर्न चाहनुहुन्छ भने, तपाईंले आफ्नो जीवनशैली परिवर्तन गर्नैपर्छ । आफूलाई शारीरिक रूपमा सक्रिय राख्नुहोस्। धेरै घण्टा बसेर काम गर्ने बानी छाेड्नुहाेस् ।
व्यायाम नगर्दा मधुमेहको जोखिम बढ्छ । यस्तो अवस्थामा हरेक दिन कम्तिमा ४० मिनेट व्यायाम गर्नुपर्छ । शारीरिक रूपमा केही नगर्नेहरूमा मधुमेहको जोखिम बढी हुन्छ। एजेन्सीबाट
