काठमाडौं । दीपकराज गिरी र दीपाश्री निरौलाको समूहले बनाउन लागेको फिल्म ‘छक्का पञ्जा ५’को पोस्टर सार्वजनिक गर्दै प्रदर्शन मिति घोषणा गरिएको छ ।
दीपाश्री निरौलाले नै निर्देशन गर्न लागे यस फिल्मको शीर्ष भूमिकामा दीपकराज गिरी र केदार घिमिरे ‘माग्ने बुढा’ छन् । अभिनेत्रीमा नायिका वर्षा सिवाकोटी अनुबन्धित भएकी छन् । निर्माण पक्षले सिवाकोटीसँग केही दिन अगाडि फिल्मका लागि साइन गरेको बुझिएको छ ।
‘छक्का पञ्जा’को यस अगाडिको प्रत्येक सिक्वेलमा फरक फरक नायिकाले काम गरेका थिए । यसपटक भने वर्षाले पाँचौ सिरिजमा काम गर्ने अवसर पाएकी छिन् ।
आमा सरस्वती मूभिज र आइएमईको प्रस्तुतिमा बन्न लागेको फिल्मको छायांकन सुरु गर्दै यसै वर्षको दसैँमा अर्थात् असोजको २४ गतेलाई प्रदर्शन मिति घोषणा समेत गरिएको छ ।
फिल्ममा दीपक शर्मा र बाबुल गिरीको संगीत, दीपकराज गिरीको कथा, हरि हुमागाँइको छायांकन रहनेछ । फिल्मलाई पोखरा, काठमाडौं र नुवाकोटमा छायांकन गरिनेछ ।
यो फिल्मले सामाजिक आयामलाई व्यंग्य गर्ने बताइएको छ । फिल्मका कलाकार तथा लेखक गिरी राजनीतिक कथावस्तु भन्दा केही पर रहेर सामाजिक कथावस्तुमा यो फिल्म बनाउने तयारीमा छन् ।
नेपाली फिल्मको व्यवसायमा रेकर्ड राख्न सफल ‘छक्का पन्जा’ को यो पाँचौँ सिरिज निर्माण घोषणा समयदेखि नै चर्चा र दर्शकको प्रतीक्षित सूचीमा छ ।
