काठमाडौं । सन् २०२३ को अन्तिम महिना प्रदर्शन भएको फिल्म ‘एनिमल’ले बक्स अफिसमा ब्लकबस्टर सावित भयो । सो फिल्ममा तृप्ति डिमरीले केही मिनेटको भूमिका खेलेर सनसनी मच्चाएकी थिइन् ।
फिल्ममा उनको अभिनयलाई दर्शकले निकै रुचाएसँगै प्रशंसकले उनलाई ‘भाभी २’ को उपनाम समेत दिएका थिए । एनिमलको सफलताबाट तृप्तिको करियरलाई सबैभन्दा बढी फाइदा भयो, अहिले उनले एक पछि अर्को ठुलो बजेटका फिल्ममा काम गरिरहेकी छन् ।
उनको हालै धर्मा प्रोडक्सनको फिल्म ‘धड्क-२’ को घोषणा गरिएको छ । फिल्मको छोटो प्रोमो सार्वजनिक गर्दै निर्माताले तृप्ति डिमरी र सिद्धान्त चतुर्वेदी मुख्य भूमिकामा देखिने जानकारी दिइएको छ । फिल्मलाई शाजिया इकबालले निर्देशन गरिरहेकी छन् । यो फिल्म नोभेम्बर २२ मा हलमा रिलिज हुने बताइएको छ ।
त्यस्तै उनको अर्को फिल्म ‘ब्याड न्यूज’ पनि आउने भएको छ । ‘गुड न्यूज’पछि धर्मा प्रोडक्सनले चाँडै ‘ब्याड न्यूज’ ल्याउने भएको छ । फिल्मको स्टार कास्टको कुरा गर्दा विक्की कौशल र एमी विर्क मुख्य भूमिकामा छन् । फिल्ममा तृप्तिले मुख्य नायिकाको रूपमा काम गरेकी छिन् । यो फिल्म जुलाई १९ मा बक्स अफिसमा रिलिज हुनेछ ।
त्यस्तै ‘भुलभुलैया ३’ मा पनि तृप्तिले काम गरेकी छन् । अनीश बज्मीको निर्देशनमा बन्न लागेको फिल्म ‘भुलभुलैया ३’ को लागि मानिसहरू लामो समयदेखि पर्खिरहेका थिए । फिल्ममा कार्तिक आर्यनले फेरि एक पटक ‘रुह बाबा’को भूमिका निभाएर मानिसहरूलाई हँसाउन लागेका छन् । यो फिल्ममा तृप्ति डिमरी पनि देखिनेछिन् । केही समय अघि उनी फिल्मको पोस्टरमा देखिएकी थिइन् ।
त्यस्तै एनिमलको सिक्वेल भनिएको फिल्म ‘एनिमल पार्क’मा पनि तृप्ति देखिँदै छिन् । सन्दीप रेड्डी वाङ्गाको निर्देशनमा बन्न लागेको यो फिल्मलाई लिएर दर्शकमा निकै उत्साह छ । मिडिया रिपोर्टका अनुसार फिल्ममा तृप्ति पनि महत्त्वपूर्ण भूमिकामा देखिने छिन् । अहिले यो फिल्म प्रि-प्रोडक्सन चरणमा छ ।
