काठमाडौं । फ्रेञ्च फुटबलर किलियन एम्बाप्पे रियल म्याड्रिड जाने पक्का भएको छ । उनले रियल म्याड्रिडसँग फ्री ट्रान्सफरको सम्झौता गरेका हुन् ।
२५ वर्षीय एम्बाप्पेको पीएसजीमा जुन ३० मा सम्झौता सकिँदै छ । त्यसपछि उनी रियल म्याड्रिड जाने सम्झौता गरेको फुटबल पत्रकार फाब्रिजियो रोमानोले जानकारी दिएका छन् ।
रियल म्याड्रिडले यस सिजनको च्याम्पियन्स लिग जितेसँगै एम्बाप्पेसँग सम्झौता गरेको उनले बताएका छन् ।
मिडिया रिपोर्टका अनुसार रियल म्याड्रिडले एम्बाप्पेलाई फ्री ट्रान्सफरमा साइन गरे पनि उनलाई करिब ११० मिलियन डलर साइनिङ रकम दिने बताइएको छ । रियल म्याड्रिडले एम्बाप्पेलाई पछिल्लो सात वर्षदेखि भित्र्याउने प्रयासमा रहेको थियो ।
उनले यसअघि नै पीएसजीका फ्यानहरूलाई एक पोष्ट लेख्दै आफूले क्लब छोड्ने जानकारी दिएका थिए । सन् २०१७ मा फ्रेञ्च क्लब मोनाकोबाट लोनमा पीएसजी आएका एम्बाप्पे २०१८ देखि पीएसजीको खेलाडी बनेका थिए ।
