काठमाडौं । वाइवाइ चाउचाउले टी २० विश्वकप खेल्न गएका नेपाली राष्ट्रिय टिमलाई प्रोत्साहित गर्न पुरस्कार घोषणा गरेको छ ।
जसअनुसार जारी विश्वकपको सुपर ८ मा पुग्न सफल भए नेपाली राष्ट्रिय टोलीलाई वाइवाइ चाउचाउले नगद ३० लाख रूपैयाँ पुरस्कार दिने सीजी फुड्स नेपाल लिमिटेडले जानकारी दिएको छ ।
साथै वाइवाइले नेपालको जीतलाई अगाडि बढाउन खेलाडीका लागि पनि पुरस्कारको घोषणा गरेको छ । जसमा हरेक रनमा १ हजार, चौकावापत ८ हजार, छक्कावापत १२ हजार, विकेटवापत १५ हजार, अर्धशतकवापत ५० हजार, शतकवापत एक लाख र नेपाली टिमको जितमा एक लाख ५० हजार रूपैयाँ नगद उपलब्ध गराउने छ ।
नेपाल क्रिकेट संघ (क्यान)सँगको सहकार्यमा पुरस्कार घोषणा गरिएको सीजी फुड्सले जनाएको छ । यसका लागि सीजी फुड्स नेपाल लिमिटेड र क्यानबीच सम्झौता पत्रमा हस्ताक्षर भएको छ ।
यस पुरस्कार घोषणाले नेपाली खेलाडीहरूलाई उच्च प्रदर्शन गर्न थप प्रोत्साहन मिल्ने चौधरी ग्रुपले जनाएको छ ।
दोस्रो पटक टी २० विश्वकप खेल्न लागेको नेपालले आफ्नो पहिलो खेल नेदरल्याण्डसँग मंगलबार खेल्दै छ । दक्षिण अफ्रिका, श्रीलंका र बंगलादेशसँग पनि नेपालले पहिलो चरणमा खेल्ने तालिका छ ।
