![sudarshan-thapa4](https://www.sutranews.com/wp-content/uploads/2024/06/sudarshan-thapa4.jpg)
![थापा पक्राउपछि ‘रावायण’को सुटिङ रोकियो, अनुमतिविना विदेशमा फिल्म बेचेको भन्दै निर्माताको जाहेरी](https://www.sutranews.com/wp-content/uploads/2024/06/sudarshan-thapa4.jpg)
काठमाडौं । फिल्म निर्देशक सुदर्शन थापा पक्राउ परेपछि उनको निर्देशनमा बन्न लागेको नयाँ फिल्म ‘रावायण’को छायांकन रोकिएको छ । आजबाट काठमाडौंबाट फिल्म छायांकन सुरु गर्ने तयारीमा रहेका थापालाई प्रहरीले आपराधिक लाभ तथा विश्वाघातको आरोपमा पक्राउ गरेपछि छायांकन रोकिएको हो ।
‘प्रसाद २’का निर्माता सुदर्शन बस्नेतको जाहेरीका आधारमा थापा पक्राउ परेका हुन् । उनीमाथि एक करोड ५० लाख ठगी गरेको आरोप छ । अब महानगरी वृत्त बौद्धको हिरासतमा राखेर उनीमाथि अनुसन्धान हुने जिल्ला प्रहरी परिसर काठमाडौंका प्रमुख एसएसपी वसन्त रजौरेले बताए । जाहेरी दिएका निर्माता बस्नेतले आफ्नो अनुमतिविना थापाले विदेशमा फिल्म बेचेको आरोप लगाएका छन्। ‘म प्रसाद २ को निर्माता हुँ तर सुदर्शन थापाले मेरो अनुमतिविना विदेशमा ९० लाखमा फिल्म बेचे,’ निर्माता बस्नेतले सूत्रन्यूजसँग भने, ‘अनि ओएसएआर डिजिटलका ओमप्रकाश अग्रवाललाई पनि ६० लाखमा डिजिटल राइट्स दिएछन् । त्यसैले जाहेरी दिएको हुँ ।’ यसअघि अग्रवालपनि यही प्रकरणमा पक्राउ परेर हाजिरी जमानीमा छुटेका थिए ।
रोयल इम्पायर होटलमा ‘रावायण’को सुटिङ तयारी गरिरहेका बेला प्रहरी वृत्त मालिगाउँले उनलाई पक्राउ गरेको प्रहरीले जनाएको छ । प्रहरी वृत्त मालिगाउँले थापालाई पक्राउ गरेर जाहेरी दर्ता भएको प्रहरी वृत्त बौद्धमा पठाएको छ । निर्देशक थापाले ‘चंखे शंखे पंखे’, ‘प्रेमगीत’, ‘म यस्तो गीत गाउँछु’, ‘म यस्तो गीत गाउँछु २’, ’अझै पनि’, ’प्रसाद २’, ‘सम्हालिन्छ कहिले मन’लगायतका फिल्म निर्देशन गरेका छन् ।
‘प्रसाद २’ ठगी प्रकरणमै फिल्मका अर्का निर्माता सुवास थापा पनि मुछिएका छन् । उनीमाथि बैंकिङ कसुरको जाहेरी पछि उनी फरार छन् । फिल्म निर्माता बनाउने भनेर व्यवसायी केशव पाण्डेसँग उनले ६२ लाख बढी रकम लिएर ठगी गरेको आरोप छ । ठगीविरुद्ध पाण्डेले जिल्ला प्रहरी परिसर काठमाडौंमा उजुरी दिएपछि त्यसकै आधारमा जिल्ला अदालत काठमाडौंमा मुद्दासमेत दर्ता भइसकेको छ । तर थापा भने अहिलेसम्म पक्राउ परेका छैनन् ।