काठमाडौं । टी २० विश्वकपमा नेपालले आफ्नो पहिलो खेलमा नेदरल्याण्ड्ससँग पराजित भयाे । तर, यो खेलमा नेपालले अनेक कीर्तिमान राख्न सफल भयो ।
जसमा नेपालका कप्तान रोहित पौडेलले पाएकाे जीवन दानदेखि सोमपाल कामीले गरेको रनआउट समेत रहेको छ । नेपाल र नेदरल्याण्ड्सको खेलमा बनेको रेकर्डहरू यस प्रकारका छन्:
रोहितमाथि अम्पायरको गलत निर्णय
नेपालको इनिङ्सको चौथो ओभरमा भान विकले एक विकेट लिएका थिए । त्यसपछि कप्तान रोहित पौडेल ब्याटिङमा आए । रोहितले भान विकको बललाई लेग ग्लान्स गर्ने प्रयास गरे । नेदरल्याण्ड्सका खेलाडीहरूले अपील गरेसँगै अम्पायरले आउट दिए ।
रोहितले तुरुन्तै समीक्षा लिए । रोहित डीआरएसमा नटआउट भए । बलले उनको प्याडमा लाग्नुअघि ब्याटलाई छोएको देखाएको थियो । अम्पायरले आफ्नो निर्णय परिवर्तन गरे र रोहितले जीवन पाए ।
रोहित टी २० विश्वकपमा अहिलेसम्मकै सबैभन्दा कान्छा कप्तान बनेका छन् । उनी २१ वर्ष २७६ दिनमा कप्तानको भूमिका खेले । यसअघि जिम्बाब्वेका प्रोस्पर उत्सेयाले २००७ को विश्वकपमा २२ वर्ष १७० दिन कप्तानी गरेका थिए ।
सोमपाल नेपालका लागि पहिलो विकेट लिने बलर
नेपालले नेदरल्यान्ड्सको इनिङ्सको दोस्रो ओभरमा पहिलो सफलता पायो । सोमपाल कामीले माइकल लेभिटलाई १ रनमा ऐरीको हातमा क्याच आउट गराए । यससँगै उनी टी २० विश्वकपमा नेपालको तर्फबाट विकेट लिने पहिलो बलर बने ।
अनौठो रनआउट
नेदरल्यान्ड्सको इनिङ्सको १४ औँ ओभरमा सिब्रान्ड एङ्गेलब्रेच अनौठो तरिकाले रनआउट भए । म्याक्स ओ’डाउडले अफ स्टम्पमा रहेको बलमा फ्रन्ट साइडमा शट खेले ।
कामीको हातले बललाई छोयो र स्टम्पमा ठोक्कियो । त्यतिबेला इङ्गेलब्रेक उनको क्रिज बाहिर थियो । जसका कारण उनी रनआउट भए ।
नेदरल्याण्ड्सले लिएको सर्वाधिक विकेट
टी २० विश्वकपमा नेदरल्याण्ड्सका लागि सर्वाधिक विकेट लिनेमा पल भान मिकेरेन पहिलो स्थानमा छन् । उनको हाल २० विकेट छ । उनीअघि अलराउन्डर बास डी लीडे १२ विकेट लिएर पहिलो स्थानमा थिए।
