काठमाडौं । महानायक राजेश हमालको नयाँ टेलिभिजन शो ‘यो नेपाली शिर उचाली’ शुक्रबार साँझ ९ः३० बजेदेखि हिमालय टेलिभिजनमा प्रसारण हुने भएको छ ।
कार्यक्रम साझा कथा युट्युब च्यानलमा पनि हेर्न सकिन्छ । कार्यक्रममा हमालले विदेशी भूमिमा संघर्ष गरी गर्व गर्न लायक काम गरेका नेपालीहरुसँग उनीहरुको कर्मथालोमा पुगेर साक्षात्कार गर्ने छन् ।
कार्यक्रमको पहिलो सिजन बेलायत र युरोपियन मुलुकलाई कर्मभूमि बनाएका नेपालीहरूको कथाबाट सुरु हुँदैछ । कार्यक्रमको पहिलो भागमा पोर्चुगलका टंक सापकोटाको कथा समेटिएको छ । उनी कुशल सेफ र सफल रेष्टुरेण्ट व्यवसायी हुन् ।
पोर्चुगलको राजधानी लिस्बनमा रहेको उनको रेष्टुरेण्ट फोर्नो द ओरो युरोपका ५० उत्कृष्ट पिजेरियामध्ये १२ औँ स्थानमा र पिज्जा नापोलितानमध्ये विश्वकै नम्बर १० मा परेको छ ।
केही दिनअघि मात्रै पोर्चुगलमा खानाको हिरा भनेर चिनिने बहुमूल्य च्याउ ट्रफल पत्ता लगाएर उनी थप चर्चामा आएका छन् । बाग्लुङका सापकोटा पोर्चुगल पुगेका थिए ।
कार्यक्रमको पहिलो भागको टिजर आफ्नो फेसबुक पेजमा शेयर गर्दै प्रस्तोता राजेश हमालले लेखेका छन्, ‘कार्यक्रम हेरिसकेपछि तपाईंले पनि भन्नु हुनेछ यो नेपाली शिर उचाली ।’
कार्यक्रम मुभ मिडिया प्रा.लि. र अल थ्री मिडिया घर प्रा.लि.ले संयुक्त रुपमा उत्पादन गरेको हो । कार्यकारी निर्माता विवेक रेग्मीले कार्यक्रममा समेटिने पौरखी कथाहरु संसारभरि छरिएका नेपालीका लागि प्रेरणा बन्ने बताए ।
कार्यक्रमले उनीहरुसँग भएको ज्ञान र सिपलाई स्वदेशसँग कसरी जोड्ने भन्ने बहसको सार्थक थालनी गर्ने उनको विश्वास छ ।
