काठमाडौं । ‘नाई नभन्नु ल ६’ मा काम गरेपछि कुनै पनि फिल्ममा नदेखिएकी अभिनेत्री प्रियंका कार्की वेव सिरिज ‘साहु बा’बाट फेरी दर्शक माझ आउने भएकी छिन् ।
पछिल्लो समय कार्की फिल्मभन्दा पनि विभिन्न रियालिटी सोको जज र म्युजिक भिडियोका काममा व्यस्त छिन् । रोडिजमा जज बस्दा त उनलाई ठूलो पर्दाबाट सानोमा झरेको भनेर धेरैले आलोचना गरेका थिए । तर, जसले जे भने पनि उनी सबैतिर छाउन चाहान्छिन् । यस्तोमा उनी अब वेव सिरिजमा आउन लागेकी हुन् ।
सुयोग योङ्गको लेखन तथा निर्देशनमा बनेको यस सिरिजमा प्रियंकाका अलवा कविता नेपाली, नम्रता श्रेष्ठ, विजु पार्की, छुल्ठिम गुरुङ, सरिता गिरी, अमित गिरी, अमितेश शाहलगायतका कलाकार रहेका छन् । डिओपीमा कार्कीकै श्रीमान आयुष्मान देशराज जोशी रहेका छन् ।
सोमबार एक पत्रकार सम्मेलन आयोजना गरी सिरिजको टिजर तथा लिरिकल गीत सार्वजनिक गरिएको थियो ।
सिरिजको ट्रेलरमा कार्की केही न्युड रोलमा देखिएकी छिन् । जसलाई लिएर पत्रकार सम्मेलनमा उनीमाथि प्रश्न थुप्रिएका थिए । जसबारे कार्कीले कथाले मागेअनुसार आफू भएको जवाफ फर्काइन् ।
“अडियन्सले यो पार्ट रुचाउनु हुन्छ या हँदैन, त्यो त मलाई थाहा छैन । तर, त्यो पार्ट चाहिँ स्टोरीको एउटा महत्वपूर्ण पार्ट भएरै खिचिएको हो”, प्रश्नको जवाफ दिँदै कार्कीले भनेकी छिन्, “मलाई लाग्दैन कि हामी त्यो जमानामा छौं ।”
उनले उक्त सिन किन आयो भन्ने कुरा सिरिज हेरेपछि मात्रै थाहा पाइने प्रतिक्रिया दिएकी छिन् ।
सँगै उक्त न्युड सिन पास होला त भन्ने प्रश्न पनि उब्जिएको छ । जसमा कार्कीले भने कथाका निम्ति उक्त सिन अनिवार्य रहेको बताइन् ।
“सेन्सर नियमहरु आफ्नो ठाउँमा छ, के पास गर्दा हुन्छ, के हुँदैन त्यो त बोर्डलाई नै थाहा होला, तर हामीले चाहिँ हाम्रो कथामा कस्तो पार्ट चाहिन्छ, त्यहीअनुसार बनाउने हो”, उनले भनेकी छिन् ।
