काठमाडौं । राष्ट्रिय प्रजातन्त्र पार्टी (राप्रपा)ले प्रधानमन्त्री पुष्पकमल दाहाल प्रचण्डलाई भारत भ्रमणका क्रममा गरिएको सम्मानमाथि प्रश्न उठाएको छ । मंगलबार बसेको प्रतिनिधिसभाको बैठकमा पार्टीको तर्फबाट बोल्दै राप्रपाका प्रमुख सचेतक ज्ञानेन्द्र शाहीको प्रधानमन्त्रीको भारत भ्रमणमाथि प्रश्न उठाएका हुन् ।
उनले भारत भ्रमण व्यक्तिगत हो कि देशको प्रधानमन्त्रीको हो भन्ने जस्तो प्रश्न उब्जेको टिप्पणी गरे ।
“पुष्पकमल दाहाल प्रचण्ड व्यक्तिगत नभएर नेपालको प्रधानमन्त्रीको हैसियतमा भारत भ्रमणमा जानुहुन्छ, भारतले गरेको सम्मान प्रधानमन्त्रीलाई गरेको सम्मान हो कि सिंगो नेपाललाई ? त्यो सम्मान हेर्दा यस्तो लाग्छ कुनै प्रदेशको मुख्यमन्त्री भारत गइरहेछन्”, शाहीले भनेका छन् ।
उनले भारतमा शीर निहुरिने अवस्था बनाएका प्रधानमन्त्रीले एयरपोर्टमा बाजा गाजा बजाउनु अर्थहिन भएको शाहीको टिप्पणी छ । “भारतमा त्यस्तो हुन्छ तर, नेपाल आउँदा तामझामका साथ, एयरपोर्टमा बाजा गाजा बजाइन्छ, बाटो जाम गरिन्छ”, शाहीले भनेका छन् ।
एक अर्को प्रसङ्गमा बोल्दै शाहीले सहकारी ठगी प्रकरणका मुख्य आरोपित जिबी राईलाई किन पक्राउ नगरिएको भन्दै प्रश्न गरेका छन् । उनले जिबी राईलाई पक्राउ गर्ने हैसियत सरकारको नभएको त होइन भनि प्रश्न पनि गरे ।
“एउटा जिबी राईलाई किन पक्राउ गर्न सकिएको छैन, एउटा व्यक्तिलाई पक्राउ गर्न नसक्ने अवस्था सरकार को हो ?” उनले भनेका छन्, “आकाशमा भएपनि पातालमा भएपनि जिबी राईलाई पक्राउ गरियोस् ।”
