काठमाडौं । नेपालले टी २० विश्वकपअन्तर्गत बुधबार बिहान श्रीलंकाविरुद्ध खेल्दै छ । समूह ‘डी’मा रहेको नेपालले आफ्नो दोस्रो खेल खेल्न लागेको हो ।
अमेरिकाको सेन्ट्रल ब्रोवार्ड रिजनल पार्क स्टेडियम, लाउण्डरहिलमा हुने खेल भोलि बिहान ५ः१५ बजेदेखि शुरु हुँदै छ । नेपालले यस विश्वकपमा पहिलो खेलमा नेदरल्याण्डससँग ६ विकेटले हार बेहोरेको थियो ।
त्यस्तै, श्रीलंकाले यस विश्वकपमा लगातार दुई खेलमा हार बेहोरिसकेको छ । श्रीलंकाले पहिलो खेलमा दक्षिण अफ्रिका र दोस्रो खेलमा बंगलादेशसँग हार बेहोरेको हो ।
समूह ‘डी’मा नेपाल र श्रीलंकाका लागि सुपर ८ मा पुग्न यो खेल जित्नै पर्ने अवस्था रहेको छ । यो समूहबाट दक्षिण अफ्रिकाले लगातार तीन खेलमा जित हासिल गरी शीर्ष स्थानमा छ ।
दक्षिण अफ्रिका सुपर ८ मा पुग्ने निश्चित हुँदै गर्दा बंगलादेशले २ खेलमा एक जित र एक हारसहित दुई अंक पाएको छ ।
