गायक शिव परियारको टिप्पणी- बालेनलाई सिध्याउन लामो तालिकासहित नयाँ खेलको सुरुवात हुन थाल्यो-Sutra News

गायक शिव परियारको टिप्पणी- बालेनलाई सिध्याउन लामो तालिकासहित नयाँ खेलको सुरुवात हुन थाल्यो

सुत्रन्यूज

शुक्रबार, १४ असार २०८१

काठमाडौं । गायक शिव परियारले काठमाडौं महानगरपालिकाका मेयर बालेन शाहलाई सिध्याउन लामो तालिकासहित नयाँ खेलको सुरुवात भएको टिप्पणी गरेका छन् ।

बेला मौकामा सामाजिक र राजनीतिक विषयमा टिप्पणी गरिरहने गायक परियारले राष्ट्रिय स्वतन्त्र पार्टी (रास्वपा)का महामन्त्री मुकुल ढकालको पछिल्लो प्रतिवेदनलाई लिएर टिप्पणी गरेका हुन् ।

महामन्त्री ढकालले पार्टीको वर्तमान अवस्थाबारे आम कार्यकर्ताबाट व्यक्त भएका भावनालाई समेटेर तयार पारेको प्रतिवेदनमा रास्वपाको जनमत कमजोर बनेको र अहिलेको जस्तै गरी अगाडि बढे रास्वपा विवेकशील साझा पार्टीको बाटोमा जाने निष्कर्ष निकालेका थिए ।

उनले प्रतिवेदनमा रास्वपाको जनमत कमजोर बनेको निष्कर्ष निकाल्दै माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा एमाले अध्यक्ष केपी शर्मा ओलीको साथमा सत्ताका लागि सम्झौता गर्नुभन्दा स्वतन्त्र मेयर बालेन शाह, हर्क साम्पाङ र गोपी हमालसँग मिल्दा पार्टीलाई हितकर हुने सुझाव दिएका थिए ।

२०८४ को निर्वाचनमा बालेन, गोपी हमाल र रास्वपाबीच सहकार्य भएमा स्पष्ट बहुमत ल्याउन सकिने ढकालको दाबी छ । प्रतिवेदनमा उल्लेख यही विषयलाई लिएर गायक परियारले टिप्पणी गरेका हुन् ।

परियारले राजनीतिक खेल बाहिर देखिए जस्तो नहुने भन्दै सुरुमा मिल्ने र पछि निल्ने कुनै पनि व्यक्ति, संस्था र राजनीतिक चरित्रसँग ‘सावधान बालेन’ भनेका छन् ।

‘अचानक नाटकीय स्वरूपमा रास्वपाले आफ्नो नयाँ प्रतिवेदनमा बालेनसँग मिलेर नगए भविष्यमा पार्टीलाई भारी पर्ने र पार्टी सकिनेसम्मको समाचार बाहिर आएको देखियो । अहिले सरकारबाट बाहिर निस्कनु पर्ने धारणा राखेको पनि देखियो,’ उनले लेखेका छन्, ‘मेरो विचारमा यो २०८४ सालमा हुने चुनावी रणनीतिका लागि पूर्व देखाएर पश्चिमतिर पड्काउने नेपाली राजनीतिका अति नै पुराना खेलाडीको योजना र डिजाइन अनुरुप, पार्टीको एउटा खेमाले बालेनसँग मिल्न चाहेको सन्देश प्रवाह गर्नुले, बालेन नयाँ शक्तिको रुपमा उदाउन सक्ने पूर्वानुमानसहित अन्तत: बालेनलाई सिध्याउने नीतिअनुरुप लामो समयको खेल तालिकासहित नयाँ खेलको सुरुवात हुन लागेको महशुस हुन्छ । यहाँ गेम बाहिर देखिए जस्तो हुँदैन बालेन । सुरुमा मिल्ने र पछि निल्ने कुनै पनि व्यक्ति, संस्था र राजनितिक चरित्रसँग सावधान बालेन ।’