काठमाडौं । स्थानीय बजारमा आइतबार पनि सुनको मूल्य बढेको छ । शुक्रबारदेखि बढेको सुनको मूल्य आइतबार पनि बढेको हो ।
नेपाल सुनचाँदी व्यवसायी महासंघका अनुसार शुक्रबारको तुलनामा आइतबार सुनको मूल्य प्रतितोला दुई सय रुपैयाँले बढेको छ । आइतबार स्थानीय बजारमा छापावाल सुनको मूल्य प्रतितोला एक लाख ४२ हजार रुपैयाँ र तेजाबी सुनको मूल्य एक लाख ४१ हजार तीन सय रुपैयाँ कायम भएको महासंघले जनाएको छ ।
यसअघि शुक्रबार छापावाल सुनको मूल्य प्रतितोला एक लाख ४१ हजार आठ सय रुपैयाँ र तेजाबी सुनको मूल्य एक लाख ४१ हजार एक सय रुपैयाँ थियो ।
सुनको मूल्य बढे पनि आइतबार चाँदीको मूल्य भने स्थिर रहेको महासंघले जनाएको छ । महासंघका अनुसार आइतबार चाँदीको मूल्य प्रतितोला एक हजार सात सय ९० रुपैयाँमा कारोबार भइरहेको छ ।
अन्तराष्ट्रिय बजारमा हुने मूल्य घटबढको प्रभाव स्थानीय बजारमा पर्ने गरेको छ । सँगै, स्थानीय बजारमा माग र आपूर्तिको श्रृंखलाले पनि मूल्यलाई प्रभावित बनाउने महासंघको भनाई छ ।
