सत्ता साझेदार दलहरूका बिचमा असमझदारी बढ्दै गर्दा प्रमुख प्रतिपक्षी दल नेपाली कांग्रेस अहिले सक्रिय बनेको छ । कांग्रेसले दलहरूबीचको छलफललाई बढाएको छ ।
कांग्रेसले विशेषगरी सत्ता समीकरणको मुख्य दल नेकपा (एमाले)सँगको छलफललाई तिव्रता दिएको छ । योबीच दुई दलका दोस्रो तह र पहिलो तहका नेताबीच छलफल भएको छ ।
कांग्रेसले छलफललाई तिव्रता दिँदै गर्दा सत्ता समीकरण फेरि परिवर्तन त हुँदैन भन्ने प्रश्न आमरूपमा उठेको छ । कांग्रेसको सक्रियतासँगै उठेको प्रश्नबारे सूत्र न्यूजका सन्देश अर्यालले कांग्रेसका प्रमुख सचेतक रमेश लेखकसँग केही जिज्ञासा राखेका छन् । लेखकसँग गरिएको कुराकानीको सम्पादित अंश :
कांग्रेस र एमाले शीर्ष नेतृत्वबीचको छलफल अहिले चर्चामा छ । तपाइँहरुबीचमा खास के विषयमा छलफल चलिरहेको छ ?
नेताहरूको बीचमा छलफल हुने कुरा स्वभाविक हो । छलफल निरन्तर हुनुपर्छ । समसामयिक विषयहरूमा छलफल भइरहनुपर्छ ।
छलफल हुँदैमा सत्ता र सरकारकै विषयमा हुन्छ भन्ने होइन । समसामयिक थुप्रै विषय छन् ।
पार्टी सभापति शेरबहादुर देउवा र एमाले अध्यक्ष केपी शर्मा ओलीबीच झण्डै तीन घण्टा बढी छलफल भएको छ । के सामान्य विषयका लागि यति लामो छलफल हुन्छ र ?
हाम्रो सभापति र एमाले अध्यक्षबीच भेट भएको हो । केही विषयमा छलफल भएका हुन् ।
यद्यपि, त्यसको दुई दिन पहिला प्रधानमन्त्री प्रचण्ड जीसँग पनि हाम्रो सभापतिको भेट भएको थियो ।
नेताहरूका बीच यस्ता भेटवार्ता भइरहन्छ । यसलाई सामान्यरूपमा बुझिनु पर्छ ।
बाक्लिँदो छलफल खास के विषयमा केन्द्रित छ ?
अहिले हेर्नुभयो भने, संसद्मा थुप्रै विधेयक विचाराधीन अवस्थामा छन् । टीआरसी लामो समयदेखि अल्झेर बसेको छ ।
मुलुकमा थुप्रै समस्याहरू देखिएकै छन् । अर्थतन्त्र अझै पनि ट्रयाकमा आउन सकेको छैन ।
यस्ता विषयमा नेताहरूबीच छलफल भइरहनुपर्छ । अहिलेको भेटवार्तालाई पनि सोहीरूपमा बुझ्नुपर्छ ।
बजेट आयो । पारित पनि भयो । तर, न एमाले सन्तुष्ट छ, न त रास्वपा । न अरु दलहरू । रास्वपाका मन्त्रीहरूले त सार्वजनिकरूपमै राजीनामा दिन्छौं भनिरहनु भएको छ ।
सत्ता साझेदार दलहरूबीच खटपटको चर्चा छ । नेताहरूले सार्वजनिक असन्तुष्टि पोखिरहेका छन् । यस्तोमा कांग्रेसको सक्रियतालाई सामान्य मान्न मिल्ला ?
जहाँसम्म सरकारमा बसेका दलहरूको सवाल छ, उहाँहरु आफैँका बीचमा विश्वासको संकट देखापरेको छ । उहाँहरु एक–अर्काका बीचमा मतान्तर बढेको छ । यो बाहिरै देखिएको विषय पनि हो ।
बजेट आयो । पारित पनि भयो । तर, न एमाले सन्तुष्ट छ, न त रास्वपा । न अरु दलहरू । रास्वपाका मन्त्रीहरूले त सार्वजनिकरूपमै राजीनामा दिन्छौं भनिरहनु भएको छ ।
यसले सरकारमा रहेका दलहरूका बीच चरम समस्या छ भन्ने त देखिएकै कुरा हो ।
यद्यपि, कांग्रेस तत्कालै सरकार बनाउने, नयाँ गठबन्धन बनाउने विषयमा छलफलमा छैन । त्यस्तो परिस्थिति आइसकेको भन्ने लाग्दैन ।
प्रधानमन्त्री प्रचण्ड स्वयम् सरकारप्रति सन्तुष्ट देखिनुहुन्न । साझेदारबीचमा तिव्र खटपटको अवस्था छ । यस्तोमा ठूलो दलको हिसाबले कांग्रेसले भूमिका खेल्ने कुरा त स्वभाविक होला नि ?
सरकारले राम्रोसँग काम गर्न सकेको छैन भन्ने कुरा सत्ता साझेदार नेताहरूमात्रै होइन, स्वयम् प्रधानमन्त्रीले भनिरहनु भएको छ । यसमा हामीले थप्नुपर्ने विषय केही छैन ।
यहाँ विडम्बना, सत्ताको चरम दुरुपयोग भएको छ । चिन्ता यता हो ।
अहिले सहकारीका पीडित रुँदै सडकमा छन् तर, सरकार पीडकलाई जोगाउन भएभरको बल लगाएर लागेको छ । सरकार देश र जनताप्रति कहिँ चिन्तित रहेको देखिन्न ।
गृहमन्त्री जस्तो जिम्मेवार मन्त्रीले जीबी राई फलानो ठाउँमा छ भनेर मिडियामा भाषणबाजी गरिरहनु भएको छ । यो त एक किसिमको गैरजिम्मेवारीको पराकाष्ठा हो ।
अहिले सरकार गैरजिम्मेवार हुँदा नै साझेदारका बीचमा समस्या पैदा भएको भन्ने हाम्रो बुझाई हो । प्रधानमन्त्रीले पनि केही गर्न सक्नुभएको छैन । अहिलेको स्थिति भनेको सरकार गैरजिम्मेवार छ, प्रधानमन्त्री लाचार हुनुहुन्छ ।
अहिले सरकार गैरजिम्मेवार हुँदा नै साझेदारका बीचमा समस्या पैदा भएको भन्ने हाम्रो बुझाई हो । प्रधानमन्त्रीले पनि केही गर्न सक्नुभएको छैन ।
होइन भने, एक जना गृहमन्त्रीले फरार अभियुक्त यहाँ छ भनेर भाषण गर्न मिल्छ ? छ भने पक्राउ गरेर ल्याउने हो । अहिलेको स्थिति भनेको सरकार गैरजिम्मेवार छ, प्रधानमन्त्री लाचार हुनुहुन्छ ।
यसको निकास दिन कांग्रेसले आफ्नो हिसाबले केही गर्छ वा गर्दैन ?
कांग्रेस अहिले सत्ता परिवर्तन गर्ने, नयाँ गठबन्धन बनाउने खेलमा छैन । उहाँहरु आफ्नै कामले कहाँ पुग्नुहुन्छ, त्यसपछि हामी हेर्छौं । तपाईँले भने जस्तै ठूलो दलको हिसाबले हामी जिम्मेवारीबाट पन्छेका छैनौ, पन्छिनौ पनि ।
याे पनि पढ्नुहाेस्
