काठमाडौं। राष्ट्रिय स्वतन्त्र पार्टी (रास्वपा)का निलम्बित महामन्त्री डा. मुकुल ढकालले रास्वपा अन्य पार्टीको डम्पिङ साइट बनिरहेको निष्कर्ष निकालेका छन् । ३८ जिल्लाको भ्रमणपछि ढकालले तयार पारेका समीक्षा यात्रा प्रतिवेदनमा यो कुरा आंशिकदेखि मध्यमस्तरसम्म सही रहेको विश्लेषण गरिएको उल्लेख छ ।
‘त्यतिमात्र होइन, पुराना पार्टीले केही व्यक्तिलाई नियोजित रुपमा नै पार्टीमा पठाई अन्तिम मौकामा पार्टी छोडी पार्टीको निरन्तर बेइज्जती गराउने श्रृंखला भविष्यमा अझ बढी देख्न सकिन्छ ,’ मुकुलको प्रतिवेदनमा उल्लेख छ ।
मुकुलको प्रतिवेदनले रास्वपामा तटस्थवाद, तदर्थवाद र यथास्थितीवाद हाबी भएको उल्लेख छ। ‘पार्टीमा अस्थायी चरित्र हाबी भएको, हरेक विषयको अस्थायी समाधान मात्र खोजिरहेको छ ,’ मुकुलले प्रतिवेदनमा लेखेका छन्, ‘कुनै पनि कुरा हुन्छ, समस्या आउँछ, त्यसलाई अस्थायी समाधान मात्र खोज्ने प्रवृत्ति देखापरेको छ । अहिलेलाई यो गरिहालौं र पछि दीर्घकालिन केही सोचौंला भन्ने हुन्छ र ? कहिले पनि दिर्घकालिन समाधानका बारेमा हामी बस्दैनौं ।’
कुनै पनि विषयमा ठोस निर्णय लिन पार्टी चुकिरहेको मुकुलको निष्कर्ष छ । ‘राम्रो भएका बेला अप्रिय निर्णय गर्दैनौं, भन्छौँ– अहिले राम्रो छ, किन माहोल बिगार्ने । नराम्रो भएका बेला पनि अप्रिय निर्णय गर्दैनौं, भन्छौँ– अहिले नराम्रो छ, माहोल थप किन बिगार्नै ? आखिर कहिले गर्ने ठोस निर्णय ?,’ प्रतिवेदनमा उनले प्रश्न उठाएका छन् ।
मुकुलले पार्टी सभापति रवि लामिछानेलाई इंगित गर्दै रास्वपामा अरुलाई गाली मात्र गर्ने प्रवृत्ति देखिएको निष्कर्ष निकालेका छन् । ‘आफ्नो भिजन, प्लान केही देखाउन सकिएन,’ रास्वपाका अनगिन्तिी कमजोरी औँल्याइएको प्रतिवेदनमा भनिएको छ,
‘सुरुवाती यात्रामा राजनीति गर्न काम नछोडौं भनियो तर अहिले राजनीति गर्न काम छोड्न पर्ने बाध्यता भइसकेको छ । सस्तो लोकप्रियतालाई प्राथमिकता दिइयो । फोटो खिचेर ठूलो मान्छे भइन्छ भन्ने प्रवृत्ति देखियो । ’
