काठमाडौं । फिल्म ‘के घर के डेराः घर नम्बर २’मा अभिनेता खगेन्द्र लामिछाने अनुवन्धित भएका छन् । निर्माणपक्षले लामिछानेलाई उनकै जन्मदिनको अवसरमा मुख्य भूमिकामा अनुवन्धित गराएको हो ।
दीपेन्द्र के खनालको निर्देशनमा तयार हुने फिल्ममा काम गर्ने पक्का भएसँगै लामिछाने उत्साहित भएका छन् । उनले, एउटा राम्रो टिम र राम्रो कथामा काम गर्न पाउँदा खुशी लागेको तर्क गरे ।
यो फिल्मलाई साउनको २५ गतेबाट छायांकनमा लैजाने तयारी गरिएको छ । फिल्मको प्रि–प्रोडक्शनको कामलाई तिव्रता दिने निर्माणपक्षले बताएको छ ।
ए प्लस इन्टरटेन्मेन्ट र नटराज क्रियशनको ब्यानरमा निर्माण हुन लागेको यो फिल्ममा अन्य कलाकारहरु एकपछि अर्को रुपमा फाइनल गर्दै जाने निर्माणपक्षले बताएको छ ।
यो फिल्ममा चर्चित लेखक बुद्धिसागरको लेखन छ । फिल्ममा शरद श्रेष्ठ, किरण महर्जन र राजिव श्रेष्ठ निर्माताको रुपमा छन् ।
फिल्मका कार्यकारी निर्माता युवराज कार्की हुन् । फिल्मलाई काठमाडौंमा रिच इन्टरटेन्मेन्ट र काठमाडौं बाहिर एफडी कम्पनीले वितरण गर्ने पक्का भएको छ । सामाजिक कथालाई रोचक तरिकाले प्रस्तुत गर्ने तयारी गरिएको निर्देशक खनालले बताए ।
