![kp_oli](https://www.sutranews.com/wp-content/uploads/2024/07/kp_oli-2.jpg)
![कठिन सुरुवाती, उत्तरार्धमा बलियो प्रभावसहित अवसरै अवसर](https://www.sutranews.com/wp-content/uploads/2024/07/kp_oli-2.jpg)
केपी शर्मा ओलीको जन्म वि. सं. २००८ सालमा बुवा मोहनप्रसाद ओली र आमा स्व. मधु ओलीको कोखबाट पूर्वी नेपालको तेह्रथुममा भएको हो । ओली सानो छँदै उनकी आमाको निधन भएको थियो । पछि उनका बुवा बालबच्चासहित झापाको सुरुङ्गामा बसाईँ सरे । कन्काई नदीको बाढीले ओली परिवारको घर बगाइदियो ।
किशोरावस्थामा ओली रामनाथ दाहालको घरमा काम गरेर विद्यालय जान थाले । ओली उनकै प्रेरणाले कलिलो उमेरमै कम्युनिस्ट बने । उनै रामनाथ दाहाल ०२९ सालमा झापाको सुखानी काण्डमा शहीद भएका थिए ।
राजनीतिक यात्राको प्रारम्भ
०२३ सालमा मार्क्सवादी अध्ययन दलको सदस्य बनेर कम्युनिस्ट राजनीतिमा होमिएका ओलीले २०२६ सालमा नेकपाको सदस्यता प्राप्त गरे । औपचारिक राजनीतिक यात्रामा प्रवेश गरेको छोटो अवधिमै (२०२७ फागुन १६ गते) झापाबाट पहिलो पटक गिरफ्तार भए । २०२८ मा झापा आन्दोलन सङ्गठन कमिटीको प्रमुखमा मनोनीत भएका उनी २०३० असोज २३ मा राज्य विप्लव तथा विध्वंसात्मक कार्यमा संलग्न रहेको जस्ता विभिन्न आरोपमा गिरफ्तार भए र ४ वर्ष गोलघरसहित १४ वर्ष जेल जीवन बिताए । २०३५ पुस ११ मा जेलमै रहँदा त्यति बेला गठन भएको नेकपा मालेको संस्थापक नेताको हैसियत प्राप्त गरे ।
२०४४ असार ११ मा जेलबाट रिहा भएका उनी पुस २ गते बसेको नेकपा मालेको केन्द्रीय कमिटी बैठकबाट केन्द्रीय सदस्यमा मनोनीत भए । २०४७ जेठ १ मा पार्टीको युवा सङ्गठन प्रजातान्त्रिक राष्ट्रिय युवा संघ, नेपालको संस्थापक अध्यक्ष भए । २०४७ पुस २२ गते नेकपा माले र मार्क्सवादीबीच एकीकरण भई बनेको नेकपा एमालेको संस्थापक केन्द्रीय सदस्य बन्न सफल भए ।
पार्टी जिम्मेवारी
ओली २०५० सालमा पार्टीको केन्द्रीय विभागको प्रमुखसहित पोलिटब्युरो सदस्यमा निर्वाचित भए । २०५१ सालमा पार्टी संसदीय विभागको प्रमुख भए । २०५४ माघमा पार्टीको छैटौँ राष्ट्रिय महाधिवेशनमा उनले प्रस्तुत गरेको कार्यनीतिक प्रस्ताव अत्याधिक मतद्वारा पारित भयो । उनी स्थायी समिति सदस्यमा निर्वाचित भए र विदेश विभाग प्रमुखको जिम्मेवारी पाए । २०५६ देखि २०५९ सालसम्म संसद्मा प्रमुख प्रतिपक्षी दलको उपनेताको भूमिका निर्वाह गरे । २०५९ माघमा पार्टीको सातौँ राष्ट्रिय महाधिवेशनबाट स्थायी समिति सदस्य तथा विदेश विभाग प्रमुखमा पुनर्निर्वाचित भए । २०६५ देखि ६६ सम्म केन्द्रीय पार्टी स्कुल विभाग प्रमुखको भूमिका निर्वाह गरे । २०६५ सालमा भएको पार्टीको आठौँ राष्ट्रिय महाधिवेशनले आन्तरिक लोकतान्त्रीकरण र बहुपदीय प्रणालीको उनको प्रस्ताव स्वीकृत गर्यो । तर उनी अध्यक्ष पदमा झलनाथ खनालसँग पराजित भए । त्यति बेला पनि विदेश विभाग प्रमुखको जिम्मेवारीसहित स्थायी समितिमा निर्वाचित भए ।
पार्टी नेतृत्वमा ओली
केपी ओली लगातार दुई पटक पार्टी अध्यक्षका रूपमा निर्वाचित भएका छन् । यो उनको दोस्रो कार्यकाल हो । २०७१ असार २५ देखि साउन १ सम्म काठमाडौँमा भएको नेकपा एमालेको नवौँ राष्ट्रिय महाधिवेशनबाट उनी पहिलो पटक अध्यक्षमा निर्वाचित भए । त्यसबेला उनले तत्कालीन वरिष्ठ नेता माधवकुमार नेपाललाई पराजित गरेका थिए । २०७८ सालमा उनी दोस्रो पटक अध्यक्षमा निर्वाचित भए । मङ्सिर १० देखि १४ सम्म चितवनमा भएको एमालेको दशौँ राष्ट्रिय महाधिवेशनमा भीम रावललाई पराजित गर्दै ओली अध्यक्षमा निर्वाचित भएका हुन ।
संसद् यात्रा
केपी शर्मा ओलीको संसद् यात्रा २०४८ सालबाटै भएको हो । उनले अहिलेसम्मका हरेक निर्वाचन लडेका छन् । त्यसमध्ये ६ वटा निर्वाचनमा विजय हासिल गरेका छन् भने एउटा निर्वाचनमा मात्र पराजित भएका छन् । उनी २०४८ सालको आम निर्वाचनमा झापा ६ बाट प्रतिनिधिसभा सदस्यमा निर्वाचित भएका थिए । २०५१ सालको मध्यावधि निर्वाचनमा झापा २ बाट निर्वाचित उनी २०५६ सालको आम निर्वाचनमा फेरि झापा ६ बाट प्रतिनिधिसभा सदस्यमा निर्वाचित भए । ओली २०६४ सालमा सम्पन्न पहिलो संविधानसभा निर्वाचनमा भने झापा ७ बाट पराजित भए । २०७० सालमा सम्पन्न दोस्रो संविधानसभामा भने झापा ७ बाटै निर्वाचित भएका थिए । यही संविधानसभाले संविधान बनायो । संविधान बनेपछिका २०७४ र २०७९ सालमा सम्पन्न निर्वाचनमा उनी झापा ६ बाट प्रतिनिधिसभा सदस्यमा निर्वाचित भएका छन् ।
सत्ता अनुभव
केपी ओलीको सत्ता यात्रा २०५१ सालबाटै प्रारम्भ भएको हो । २०७२ सालमा प्रधानमन्त्री बन्नुअघि उनले २ पटक मन्त्री भएर मन्त्रालय सम्हालेको अनुभव लिइसकेका थिए । २०५१ सालमा गठन भएको तत्कालीन मनमोहन अधिकारी नेतृत्वको एमालेको अल्पमतको सरकाका गृहमन्त्री ओली नै हुन । पछि दोस्रो जनआन्दोलन सफल भएपछि २०६३ सालमा बनेको गिरिजाप्रसाद कोइराला नेतृत्वको सरकारमा उनी उपप्रधानमन्त्रीसहित परराष्ट्र मन्त्री बने ।
उनै ओली अहिले चौथो पटक प्रधानमन्त्री बनेका छन् । यसअघि संविधानसभाले संविधान बनाएपछि २०७२ असोज २४ गते उनी पहिलो पटक प्रधानमन्त्रीमा निर्वाचित भएका थिए । त्यसबेला उनको कार्यकाल २०७३ साउन ९ सम्म रहेको थियो । त्यस्तै २०७४ सालको आमनिर्वाचनपछि फागुन ३ गते उनी प्रधानमन्त्रीमा नियुक्त भए । संसद् विघटनपछिको विवादसँगै उत्पन्न राजनीतिक खिचातानिकाबीच २०७८ वैशाख ३० गते उनले तत्कालीन राष्ट्रपति विद्यादेवी भण्डारीबाट पुनः शपथ लिए । उनी २०७८ असार २९ सम्म प्रधानमन्त्री पदमा रहे ।
भिडियाेमा पनि हेर्नुहाेस्