काठमाडाैं । हिन्दु धर्मावलम्बीहरूले निकै महत्व दिने श्रावण महिनाको अवसर पारेर पवित्र पशुपति क्षेत्रको बनकालीमा आजदेखि श्रीमद्भागवत विश्व कल्याण मासिक ज्ञान महायज्ञको औपचारिक उद्घाटन भएको छ । मानवसेवा फाउन्डेसन नेपालको मुख्य आयोजनामा ललितपुरमा निर्माणाधीन मामाघर अनाथालय आश्रम र ज्येष्ठ नागरिकका लागि छोरीको घर आश्रम निर्माणका लागि आर्थिक सहयोग जुटाउने उदेश्यले ऐतिहासिक कोटीहोम ज्ञान महायज्ञको आयोजना भएको हो ।
आजदेखि सुरु भएको ऐतिहासिक कोटीहोम यात्रा श्रावण ३१ गतेसम्म जारी रहनेछ ।
निकै पवित्र मानिने श्रावण महिनाभरि चल्ने महायज्ञ अवधिभरि एकसय आठ पण्डितबाट विभिन्न पुराणको पाठ पारायण, वैदिकमन्त्रसहित अनवरत रूपमा नियमित हवन, पाँच हजार १०० दिव्य कलश पूजन, चार वेद पाठ, ११ हजार बढी बालिकाको कन्या पूजन, हजारौँको तुलादान, २१ हजार बढी ज्येष्ठ नागरिकको सम्मान, तण्डुलाचल चामलको पर्वत निर्माण लगायतको कार्यक्रम पनि नियमित रूपमा सञ्चालन हुनेछ ।
महायज्ञमा वाचन प्रवीण पण्डित दीनबन्धु पोखरेल, राधिका दासी, श्रीराम कथावाचक चन्द्रकला सखी र श्रीमदभागवतकी लोकप्रिय युवा कथा वाचिका देवीप्रतिभा लगायतले कथावाचन गर्ने जनाइएको छ । महायज्ञको पूर्वसन्ध्यामा कलश शोभा यात्रा गरिएको थियो ।
ललितपुरको बाँडेगाउँमा सञ्चालित मामाघर आश्रम र भक्तपुरको चाँगुनारायणमा सञ्चालित छोरीको घर ज्येष्ठ नागरिक आश्रमको भवन निर्माण सहयोगार्थ उक्त महायज्ञ आयोजना हुन लागेको हो । मानवसेवा फाउन्डेसन अन्तर्गत नै अहिले मामाघर आश्रम र छोरीको घर ज्येष्ठ नागरिक आश्रम सञ्चालनमा रहेका छन् ।
स्थापना भएको एक वर्ष मात्र भएको र उक्त मामाघर आश्रममा देशका विभिन्न स्थानका करिब ७५ जना अभिभावकविहीन बालबालिकाले निःशुल्क रूपमा गाँस, बास, कपास, स्वास्थ्य र शिक्षा प्राप्त गर्दै आएका छन् । त्यस्तै छोरीको घर ज्येष्ठ नागरिक आश्रममा पनि दर्जन बढी बेसहारा आमाबुबाले आश्रय प्राप्त गर्दै आएका छन् ।
साउन महिनामा आयोजना भएको कोटीहोम महायज्ञमा दर्शनार्थीको चापलाई मध्यनजर गरेर मानव सेवा फाउन्डेसनका साथै अन्य दर्जन बढी संघसंस्थाका प्रतिनिधि/ स्यंसेवकले महायज्ञमा आउने दर्शनार्थीको सहजिकरण गरिरहेका छन् ।
