काठमाडौं । जुन २७ बाट प्रदर्शनमा आएको फिल्म ‘कल्की २८९८ एडी’ले नयाँ नयाँ रेकर्ड बनाइरहेको देखिन्छ । दक्षिण भारतीय सुपरस्टार प्रभास अभिनित यो फिल्मले प्रदर्शन भएदेखिनै अलग अलग रेकर्ड तोड्दै आएको छ ।
हालै यो फिल्मले उत्तरी अमेरिकामा दोस्रो सबैभन्दा धेरै कमाउने भारतीय फिल्म बन्न सफल भएको छ । अब यो फिल्मको नाममा अर्को कीर्तिमान दर्ता भएको छ र त्यो पनि बलिउड अभिनेता शाहरुख खानको फिल्म ‘जवान’को रेकर्ड तोडेको छ ।
‘कल्की २८९८ एडी’ले अनलाइन टिकट बुकिङ वेबसाइट बुक माई शोमा टिकट बिक्रीको हिसाबले जवानको कीर्तिमान तोडेको हो । २० दिनमा बुक माई शोमा ‘कल्की’ को १२.१५ मिलियन अर्थात् १,२१,५०,००० करोडको टिकट बिक्री भएको छ । बुक माई शोमा अहिलेसम्म कुनै पनि फिल्मको यति धेरै टिकट बिक्री भएको छैन । यसअघि यो कीर्तिमान शाहरुख खान र नयनताराको फिल्म जवानको नाममा थियो जसको १२.०१ मिलियन अर्थात् १,२०,१०,००० टिकट बिक्री भएको थियो ।
टिकट बिक्रीको हिसाबले ‘कल्की’ ले गरेको यो मात्रै उपलब्धि होइन, बुक माई शोमा एक घण्टामा ९५ हजार ७१० टिकट बिक्री गरेर नयाँ कीर्तिमान पनि बनाएको छ । यस मामिलामा पनि ‘कल्की’ ले शाहरुख खानको फिल्म ‘जवान’लाई पछि पारेको छ । ‘जवान’ को एक घण्टामा ८६ हजार टिकट बिक्री भएको थियो ।
‘कल्की २८९८ एडी’को बक्स अफिस कलेक्शनको कुरा गर्दा पहिलो साता ४१४.८५ करोड कमाएको थियो । दोस्रो हप्तामा १२५.८ करोड कलेक्सन गरेको थियो। तेस्रो हप्ताको अहिलेसम्मको कमाईलाई मिलाएर हेर्ने हो भने ‘कल्की २८९८ एडी’ ले घरेलु बक्स अफिसमा ५९६.३२ करोडको व्यापार गरेको छ । योसँगै यसको विश्वव्यापी आम्दानीको आंकडा १,००० करोड नाघेको छ।
‘कल्की २८९८ एडी’लाई नाग अश्विनले निर्देशन गरेका हुन् । फिल्मलाई वैजयन्ती मुभिजले निर्माण गरेको हो । फिल्ममा प्रभासका अलावा दीपिका पादुकोण, अमिताभ बच्चन, कमल हसन, दिशा पटानी, मृणाल ठाकुर, शोभना र राजेन्द्र प्रसाद लगायत धेरै कलाकारले अभिनय गरेका छन् । यी बाहेक दर्शकले दुल्कर सलमान, विजय देवरकोंडा र निर्देशक एसएस राजामौलीको पनि क्यामियो देख्न सकिन्छ।
