काठमाडाैं । आगामी असोज १७ गते घटस्थापनाको अवसर पारेर प्रदर्शनमा आउने फिल्म ‘बेहुली फ्रम मेघौली’को नयाँ गीत सार्वजनिक भएको छ।
‘उडायो मन’ बोलको गीत आज ओएसआर डिजिटलबाट सार्वजनिक गरिएको हो । गीतमा इन्द्रकला राइको स्वर रहेको छ भने जयन जे वाइवाको संगीत र शब्द छ ।
ब्ल्याक हर्स पिक्चर्स र मेघौली फिल्मस्को व्यानरमा निर्माण भएको फिल्मको सार्वजनिक गीतमा नेपाली भाषासँगै थारु भाषाको गीतसमेत मिश्रण गरिएको छ । सो गीतका मूल सर्जक केशवराज महतो हुन् भने थारु शब्दको पुनर्लेखन अशोक थनेतले गरेका हुन् ।
शेखर घर्ती मगरले कोरियोग्राफी गरेको गीतको भिडियोमा फिल्मकी शीर्ष अभिनेत्री स्वस्तिमा खड्का मुख्यरुपमा फिचर भएकी छन् । उनका अलावा सिम्रिक खड्का तथा निश्चल बस्नेत फिचर भएका छन् । गीतले प्रेमीको पखाईमा बसेकी एक युवतीको उमंग बोल्छ । भिडियो हेर्दा निश्चल आउने दिनको पखाईमा स्वस्तिमा उत्साहित हुँदै रमाइरहेकी देख्न सकिन्छ ।
फिल्ममा निश्चल र स्वस्तिमाका अलवा बसुन्धरा भुषाल, बिजय बराल, सिमरन खड्का, लोकेन्द्र लेखक, रक्षा थापा, सिरु बिष्ट, आमिर गौतम, शिशिर सिवाकोटी, टीका पहारी, प्रभाकर शर्मा, लुनिभा तुलाधर, मुकुन्द मैनाली र रामबाबु रेग्मीको अभिनय रहेको छ । सिनेमामा केशव पाण्डे र लक्ष्मण पाण्डेको स्टील फोटोग्राफी रहेको छ ।
फिल्ममा साजन काफ्ले र आकाश बरालको लेखन तथा निर्देशन रहेको छ । यो उनीहरुको डेव्यु निर्देशकिय फिल्म हो । अभिनेत्री स्वस्तिमा खड्कालाई निर्माणमा निर्देशक तथा श्रीमान निश्चल बस्नेतले सघाएका छन् । फिल्मका कार्यकारी निर्माता फिरोज खड्का र शंकर पाण्डे हुन् ।
फिल्ममा नरेन्द्र मैनालीको छायांकन, प्रदीप लामा र केवीका खत्रीको कोरियोग्रफी, जयन जे वाइवा र कुशल पोखरेलको संगीत, निमेष श्रेष्ठको सम्पादन, घनश्याम श्रेष्ठको प्रोडक्सन डिजाइन र केशव पाण्डे र लक्ष्मण पाण्डेको स्टील फोटोग्राफी छ ।
यस फिल्मलाई एप्पल इन्टरटेनमेन्ट र डिसिएनले वितरण गर्ने जिम्मा लिएको छ ।
