काठमाडौं । फिल्म ‘छक्का पन्जा ५’ को छायांकन केही दिन अघि सम्पन्न भयो । सामाजिक कथावस्तुलाई कमेडीको शैलीबाट भनिएको यो फिल्मको ५१ दिनमा छायांकन सकिएसँगै निर्माण पक्षले छायांकनको क्रममा धेरै हल्ला गरेन ।
निर्माण पक्षले एउटा गीत बाँकी राखेर अन्य सबै दृश्यको छायांकन सकेको हो ।
दीपाश्री निरौलाको निर्देशनमा तयार भएको फिल्मको छायांकन सकिए पनि अन्य कलाकारहरूको बारेमा केही जानकारी दिइएनन् । यो फिल्मको मुख्य भूमिकामा दीपकराज गिरी, केदार घिमिरे, वर्षा सिवाकोटी छन् । यस बाहेक फिल्मका अन्य सह-कलाकारहरूका बारे निर्माण पक्षले केही खुलाएको छैन ।
बुझिए अनुसार यस पटक छक्का पन्जाको निर्माण पक्षले तीन जनाको मात्र नाम बाहिर ल्याएर सबै कलाकारलाई रिलिजकै क्रममा मिडिया सामु जानकारी दिने तयारी निर्माण पक्षले गरेको छ । फिल्मका अन्य सह-कलाकारहरूका बारेमा धेरै लुकाउने प्रयास गरे पनि सूत्र न्युजले फिल्मका केही कलाकारहरूको नाम पत्ता लगाएको छ ।
यो फिल्ममा ‘प्रेमगञ्ज’मा अभिनय गरेर चर्चामा आएका कलाकार तेज गिरीको पनि अभिनय रहेको बुझिएको छ । फिल्ममा उन के हो भन्ने खुलेको छैन ।
फिल्ममा तेजसँगै प्रकाश घिमिरे र राजाराम पौडेलको पनि अभिनय रहेको छ ।
हरि हुमागाँइको छायांकन रहेको फिल्मका कार्यकारी निर्माता निर्मल शर्मा हुन् । फिल्म असोजको २४ गते फूलपातीबाट रिलिजमा आउने फिल्मले बक्स अफिसमा उच्च व्यापार गर्ने अनुमान लगाइएको छ ।
