काठमाडौं । लेखक तथा निर्देशक लक्ष्मण सुवेदीको सामाजिक कथानक फिल्म ‘सतीदेवी’को निर्माण टिमले ‘ठुङ मार्ने’ प्रतियोगीताको घोषणा गरेको छ । भदौको ७ गतेबाट देशब्यापी प्रदर्शनमा आउने फिल्मको निर्माण टिमले मौलिकता झल्कने एउटा समुहको फोटो सार्वजनिक गर्दै सोही थिम अनुसारको फोटो पठाउन आग्रह गरेको हो ।
फोटोमा फिल्मका मुख्य कलाकारहरु मलिका महत, श्रृजना अधिकारी, सुजीता सिवाकोटीको साथमा तीन बालकलाकारहरु हर्षिका वली, मञ्जिला बानियाँ र समृद्धि सेन्चुरी घरको पीढीमा लस्करै बसेर एक अर्काको ठुङ मारिरहेका छन् । प्रतियोगीतामा सहभागी हुनका लागि परिवारका महिला सदस्यले सँगै बसेर ठुङ मार्दै गरेको फोटो खिचेर सामाजिक संजालमा ‘सतीदेवी भदौ ७ गतेबाट प्रदर्शन हुँदैछ’ भनेर क्याप्सन लेख्नुपर्नेछ ।
प्राप्त फोटोहरुमध्ये प्रथम स्थान हासिल गर्नेलाई २० हजार, दोस्रो हुनेलाई १० र तेस्रो हुनेलाई ५ हजार अनलाइनमार्फत प्रदान गरिने निर्माण कम्पनी दिलासा क्रियशनले बताएको छ । फोटो साउनको ३१ गतेसम्म पठाइसक्नुपर्नेछ ।
यो फोटो प्रतियोगीताको घोषणा भदौको ३ गते हुनेछ । फिल्मका लेखक सुवेदीले तीज पर्व नजिकिरहेकाले महिलाहरुको सम्मानमा यो प्रतियोगीता आयोजना गरिएको बताए ।
रिलिज अगावै विभिन्न अवार्ड जितिसकेको यो फिल्म चर्चामा छ ।
नारीप्रधान यस फिल्मको मुख्य भूमिकामा अभिनेत्री मलिका महत छिन्। साथमा रमेश बुढाथोकी, कुलदीप अधिकारी, भोलाराज सापकोटा, सन्दीपबाबु लोहनी, सृजना अधिकारी, हर्षिका वली, मञ्जिला बाँनिया, सुजिता शिवाकोटीलगायत कलाकारहरूको अभिनय छ।
दिलासा र साराको प्रस्तुती रहेको फिल्मको निर्मातामा श्रीदेवी, दिलासा र सारा सुवेदी छन्।
यस फिल्मलाई उपत्यकामा रिच इन्टरटेन्टमेन्ट र उपत्यकाबाहिर एफडी कम्पनीले वितरण गर्नेछन्।
