काठमाडौं । क्राइम थ्रिलर ‘देवी’को दुई पोस्टर सार्वजनिक गरिएको छ । नाजिर हुसेन, गौरव पहारी तथा शिल्पा मास्के स्टारर फिल्मले आफ्ना दुई शीर्ष पुरुष कलाकारको पात्र पोस्टर सार्वजनिक गरेको हो ।
सञ्जोग राईको निर्देशन रहेको फिल्मको सार्वजनिक पोस्टरमा अभिनेताद्वय गौरव र नाजिरको पात्र चित्र प्रस्तुत गरिएको छ । निर्देशक राईले यसै फिल्मबाट निर्देशनमा डेब्यू गरेका हुन् ।
यसअघि नै फिल्मकी मुख्य अभिनेत्री शिल्पाको चरित्र पोस्टरसार्वजनिक भइसकेको छ । भदौ २१ गते रिलिज हुने फिल्मले क्राइम थ्रिलर कथा पेस गर्ने जानकारी निर्माण पक्षले दिएको छ।
नेपालसहित विदेशमा पनि एकसाथ प्रदर्शनमा आउने ‘देवी’ एक्जिबिट स्टुडियोको प्रस्तुतिमा बनेको फिल्म हो । यो फिल्मले बाँसुरी फिल्म्ससँगको सहकार्य गरेको छ ।
फिल्मले महिलामाथि हुने यौनहिंसा विरुद्धको कथा पेस गर्ने बताउँदै निर्देशक राईले आफूले यसमा व्यावसायिक भन्दा पनि इमान्दार भएर एउटा राम्रो फिल्म बनाउने प्रयास गरेको बताए ।
फिल्ममा अभिनेत्री शिल्पा पत्रकार, गौरव अपराध अनुसन्धान गर्ने प्रहरी तथा नाजिर एक संस्था सञ्चालकको भुमिकामा पर्दामा प्रस्तुत हुनेछन् । फिल्ममा वरिष्ठ अभिनेता टीका पहारीको पनि अभिनय रहेको छ ।
रेमन गुरुङ, नारायण राई र सञ्जोग राईको निर्माण रहेको फिल्मको कार्यकारी निर्माता जावेद खान तथा सह-निर्माता उजेन नोर्वे गुरुङ र मिलन लामा हुन् । जोएल फ्रोमले छायांकन गरेको फिल्मको पटकथामा निर्देशक राईलाई अजय गौतमले सघाएका छन् ।
यो फिल्मलाई मनोज राठी र उज्वल पौडेलले वितरण गर्ने जिम्मा लिएको छ ।
