काठमाडौं । ‘द युगदेखि युगसम्म’बाट फिल्म क्षेत्रमा प्रवेश गरेकी नायिका अनु शाह पछिल्ला केही वर्षदेखि फिल्म क्षेत्रबाट हराए जस्तै थिइन् । किनकी, उनको हातमा फिल्म नै थिएनन् । म्यूजिक भिडियोमा भने उनी फाट्टफुट्ट देखिँदै आएकी थिइन् ।
दश वर्षअघि अनुले फिल्म ‘भैरव’मा काम गर्दासम्म राम्रै क्रेज थियो । अभिनेता निखिल उप्रेतीको जोडीका रुपमा अभिनय गरेको ‘भैरव’ले राम्रै चर्चा कमायो । यही फिल्मबाट उनलाई दर्शकले चिन्ने मौका पाए । तर, यो फिल्मपछि उनलाई भैरवकै जस्तो क्रेज फर्काउने फिल्ममा मेकरले लिन सकस माने ।
अनुको पछिल्लो समय प्रदर्शनमा आएको फिल्म ‘पसिना’ हो । यो फिल्म पाँच वर्षअघि प्रदर्शनमा आएको थियो । यस फिल्मलाई दर्शकले हलमा आएर उत्रेको पत्तै पाएनन् । यसपछि केही वर्ष गुमनाम बनेकी उनको शुक्रबारदेखि प्रदर्शनमा आएको ‘ईश्वर’मार्फत झन्डै पाँच वर्षपछि कमब्याक गरिन् ।
फिल्मी यात्रा सुखद बनाउन नसकेकी आफ्नो कामले भन्दा गसिपका कारण चर्चामा रहेकी अनुलाई फेरि पनि फिल्म क्षेत्रमा समस्या भोग्ने भएकी छन् । उनको फिल्मी करिअरको ग्राफ फिल्म ‘ईश्वर’पछि रेड जोनमा पुगेको छ । शुक्रबारदेखि हलमा लागेको फिल्मको व्यापार निकै कमजोरसँगै दर्शकको साथ पाउन सकेन । यसैले अधिकांश मल्टिप्लेक्सबाट यो फिल्मलाई आइतबारबाटै हटाइदिएका छन् ।
जो होस्, राम्रो फिल्म गर्न पाए हुन्थ्यो भन्ने इच्छाले आफैंलाई गाह्रो बनाएको र ठूलो पर्दामा करिब पाँच वर्षदेखि नदेखिएको प्रतिक्रिया दिँदै फिल्म ‘ईश्वर’बाट ठूलो आशा रहेको बताएकी अनुको कमब्याक निकै कमजोर बनेको देखिन्छ । यो फिल्मले व्यापारिक रुपमा निर्मातालाई ठूलो घाटा दिएसँगै दर्शकले फिल्म हलमा आएर उत्रेको पत्तै नपाए जस्तै बन्न पुगेको छ ।
केही समयअघि फिल्मको पत्रकार भेटघाट कार्यक्रममा अनुले “दर्शकले आफूलाई माया गरेसम्म यो क्षेत्रबाट टाढा नहुने” बताउन भ्याइन् । आफ्नो करिअरमा केही फिल्ममा काम गरेकोबारे भने अहिले पछुतो नलागेको र फिल्म ‘पसिना’मा काम गरेपछि फिल्मको अफर आए पनि अपेक्षा गरेअनुसारको स्क्रिप्ट नआउँदा काम नगरेको भनेर चित्त बुझाइन् । तर, ‘ईश्वर’ले अनुको आगामी यात्रा अप्ठ्यारो स्थितिमा परेको देखिन्छ । किनकी, उनको हातमा अब नयाँ फिल्म छैनन् ।
राजु गिरी निर्देशित फिल्म ईश्वरमा अनुसँगै सुनिल थापा, शिशिर वाङ्गदेल, माओत्से गुरुङ, रविन्द्र झा, बुद्धि तामाङ, पृथ्वीराज प्रसाईं, ध्रुव थापा, कृष्टि गुरुङ, सुविन बाँस्तोला, युवराज गिरीलगायतको अभिनय रहेको छ ।
