काठमाडौं । फिल्म ‘सतीदेवी’को ट्रेलर सार्वजनिक भएको छ । भदौको ७ गतेबाट रिलिजमा आउन लागेको यो फिल्मको सार्वजनिक ट्रेलरमा छोरीहरु मात्रै जन्मिँदा समाजले हेर्ने दृष्टिकोण, अभिभावकले गर्ने भेदभाव तथा छोरीहरुले आफ्नो परिवारका लागि उठाउने जोखिमको विषयलाई प्रस्तुत गरिएको छ ।
निर्देशक लक्ष्मण सुवेदीको लेखन, निर्माण र निर्देशनमा बनेको फिल्मको शीर्ष भूमिकामा मलिका महत छिन् । उनको साथमा फिल्ममा दुई बालकलाकार हर्षिका वली र मञ्जिला बानियाँ, कुलबहादुर अधिकारी, सिर्जना अधिकारी, रमेश बुढाथोकी, भोलाराज सापकोटा, सन्दीपबाबु लोहनी, सुजिता शिवाकोटी, सन्देश लिम्बू, मनीषा सापकोटा लगायतको अभिनय छ ।
दिलासा क्रियसनले गोल्डेन स्टेट मुभी मेकर्स एलएलसी क्यालिफोर्नियासँग सहकार्य गरेको फिल्म को निर्मातामा श्रीदेवी, विशाल, दिलासा र सारा सुवेदी हुन् ।
सामाजिक कथालाई उठान गरेको यो फिल्ममा तारा थापाको सम्पादन, बाबु श्रेष्ठको छायांकन, रामजी लामिछानेको कोरियोग्राफी, दीपक शर्मा र सुभाष भुसालको संगीत रहेको।
सतिदेवीले विभिन्न महोत्सवमा उत्कृष्ट फिल्म, निर्देशक, स्क्रिप्ट अनि अभिनेत्रीको अवार्ड जितिसकेको छ ।
कार्यक्रममा बोल्दै फिल्मका निर्देशक सुवेदीले अहिलेसम्म रिलिजमा आएका नेपाली फिल्ममध्ये ‘सतीदेवी’ उत्कृष्ट बनेको दाबी गरे । उनले यो फिल्म नभएर प्राण भएको तर्क गरे ।
