काठमाडाैं । क्यूएफएक्स चेनको नयाँ हल खुलेको छ ।
काठमाण्डौँको सामाखुशी चोकस्थित सिटी स्क्वायर मलमा क्यूएफएक्सको अर्को नयाँ हल बिहिबार साँझ अभिनेता दीपकराज गिरी, किरण केसी, रमेश उप्रेती, जीतु नेपाल, निर्मल शर्मा, गायक प्रकाश सपूत र अभिनेत्री नीति शाहले संयुक्त रुपमा सिनेमा हलको उद्घाटन गरेसँगै औपचारिकरुपमा संचालनमा आएको हो ।
क्यूएफएक्सले ब्यवस्थापन गर्ने हलको गत महिनादेखि सफ्ट-ओपनिङ भएपनि शुक्रबारदेखि औपचारिकरुपमा हल संचालनमा आउने हल संचालक तथा उद्यमी सुमित मैनालीले जानकारी दिए ।
सामाखुसीलाई सेन्ट्रल बनाएर हेर्दा यो हलमा सिनेमा हेर्नकालागि टोखा, गंगबु, बुढानिलकण्ठ तथा नारायणगोपाल चोकका दर्शकलाई पायक पर्ने क्युएफएक्सले भनाइ छ । यो सँगै क्यूएफएक्सले देशभर आफ्नो मल्टीप्लेक्स हल संख्या १७ वटा पुर्याएको छ ।
सिटी स्क्वायर मलको नौँ तल्लामा तीन वटा पर्दा रहेको यो सुविधा सम्पन्न हलमा ४ सय ९७ दर्शकले एक साथ फिल्म हेर्न सक्छन । करिब १८ करोडको लागतमा निर्माणमा ल्याईएको यो फिल्म हलको हरेक पर्दामा सोफा सेट सहित सुतेर समेत सिनेमा हेर्ने सिटहरु जडान गरिएको छ । दर्शकलाई रिफ्रेसमेन्ट गर्नु परेको खण्डमा हलको ११ औँ र १२ औँ तल्लामा कसमी बार एण्ड लाउन्ज समेत सञ्चालनमा ल्याईएको छ ।
विशेषत यो हलका सवै थिएटरमा पिक्चर र साउन्ड क्वालिटीलाई उच्च प्राथमिकतामा राख्दै एसियाकै सर्वोत्केष्ट साउन्ड एरोम्याक्स वाई बार्को र दक्षिण एसियाकै सिरिज फोर बार्को लेजर प्रोजेक्सन प्रविधि जडान गरिएको संचालक मैनालीले दावी गरेका छन् ।
कार्यक्रममा हल उद्घाटन गर्न पुगेका कलाकर्मीहरुले पनि साउन्ड क्वालिटी र प्रोजेक्सनको खुलेर तारिफ गरे।
