काठमाडौं । सादा पोशाक अर्थात घुमुवा प्रहरीको करामातले बदनाम रौतहटको चन्दरनिगाहपुरमा एक जना नक्कली घुमुवा प्रहरी पक्राउ परेका छन् ।
पक्राउ पर्नेमा स्थानीय माधव नारायण नगरपालिका १ का २४ वर्षीय रमेश साह रहेको जिल्ला प्रहरी प्रवक्ता डीएसपी एलिजा गिरीले बताइन् । उनलाई सार्वजनिक मुद्दाअन्तर्गत अभद्र व्यवहार मुद्दा दायर गरी जिल्ला प्रशासन कार्यालय रौतहटबाट म्याद थप गरी अनुसन्धान भइरहेको प्रवक्ता गिरीले जानकारी दिएकी छन् ।
गौर चन्द्रिगाहपुर सडक खण्डअन्तर्गत ड्डमरिया बजारमा गत मंगलबार राति ११ बजे आरोपी रमेशले आफू सादा पोसाकको घुमुवा प्रहरी भएको भन्दै केही मानिसको जिउको खानतलासी गर्ने र पैसा लिने योजनामा रहेको भनी इलाका प्रहरी कार्यालय चन्द्रिगाहपुरमा सूचना आएको थियो ।
सूचनालगत्तै प्रहरी टोलीले आरोपी रमेश साहलाई नियन्त्रणमा लिएर उसले बोकेको झोला जाँच गर्दा सशस्त्र प्रहरीको एक थान तयारी पोसाकसमेत बरामद भएको थियो । हाल आरोपी नियन्त्रणमा रहेको जिल्ला प्रहरी कार्यालयले जनाएको छ ।
