काठमाडौं । यस वर्षको दशैंको अवसर पारेर आगामी असोज २४ गतेबाट दशैंको फूलपाती अवसर पारेर प्रदर्शनमा आउने फिल्म ‘छक्का पञ्जा ५’ पहिलो गीत ‘बिहे भाको छैन’ सार्वजनिक भएको छ । गीतमा सविन सुवेदी र बेनिशा पौडेलको स्वर, दीपकराज गिरी र दीपक शर्माको शब्द तथा दीपक शर्मा स्वयंको संगीत छ ।
गीतमा फिल्मका प्रमुख अभिनेता दीपकराज गिरी र अभिनेत्री वर्षा शिवाकोटी फिचर्ड छन् । सुनिल क्षेत्रीको कोरियोग्राफी रहेको गीतको अन्तिममा अर्का कलाकार केदार घिमिरे ‘माग्ने बुढा’ देखिएका छन् ।
प्रेम भावले भरिएको यो गीतलाई लोक शैलीमा तयार पारिएको छ । केही टिपिकल शब्द छन्, जसले गाउँको छनक दिन्छ, लोकको सुवास दिन्छ । अडियो पक्ष बलियो रहेको गीत दर्शकले रुचाउन सक्छन् ।
प्रेमिल गीत वास्तविकताको सेरोफेरोमा घुम्छ । रुमानी कल्पनामा भन्दा वास्तविकता संसारलाई गीतले टपक्क टिपेको छ । प्रेममा हुने छटपटि, सम्पत्ति नहुने केटालाई केटालाई छोरी दिन गाह्रो मान्ने प्रवृत्ति, सरकारी जागिरेप्रतिको आशक्ति र त्यसको लोभमा गीतमा छ ।
दीपाश्री निरौलाको निर्देशित फिल्ममा हरि हुमागाइँको डिओपी तथा उत्तम हुमागाइँको छायांकन, दीपकराज स्वयंको पटकथा लेखन, दीपक, केदार घिमिरे र दिलीप तामाङको कथा र संवाद, रोशन श्रेष्ठको द्वन्द्व तथा विपिन मल्लको सम्पादन छ ।
