काठमाडौं । स्थानीय बजारमा बुधबार सुनको मूल्य घटेको छ । मंगलबार एकैदिन प्रतितोला दुई हजार एक सय रूपैयाँ बढेर हालसम्मकै उच्च विन्दुमा पुगेको सुनको मूल्य आज प्रतितोला तीन सय रूपैयाँ घटेको हो।
नेपाल सुनचाँदी व्यवसायी महासंघका अनुसार मूल्य घटेसँगै आज सुनको मूल्य प्रतितोला एक लाख ५० हजार पाँच सय रूपैयाँ कारोबार भएको छ । यसअघि मंगलबार सुनको मूल्य प्रतितोला एक लाख ५० हजार आठ सय रूपैयाँमा कारोबार भएको थियो।
सुनको मूल्य घटेसँगै बुधबार चाँदीको पनि मूल्य घटेको छ। मंगलबारको तुलनामा प्रतितोला ५ रुपैयाँले घट्दै आज चाँदी प्रतितोला १७ सय ३५ रूपैयाँमा कारोबार भइरहेको महासंघले जनाएको छ ।
विशेषगरी मध्यपूर्वमा तनाव बढेसँगै सुनको मूल्य अन्तराष्ट्रिय बजारमा आकासिन थालेको छ । जसको प्रभाव स्थानीय बजारमा देखिएको विश्लेषकहरुको बुझाई छ ।
प्रतिक्रिया दिनुहोस्
