काठमाडौं । गायन रियालिटी शो ‘द भ्वाइस किड्स’ सिजन-३ को उपाधि अनुया तामाङले जितेकी छिन्।
शनिबार राति भएको ग्राण्ड फिनाले कार्यक्रममा टीम प्रमोद खरेलकी प्रतिस्पर्धी तामाङले उपाधि हात पारेकी हुन्।
फिनालेमा ८ जना फाइनलिस्टले उपाधिका लागि प्रतिस्पर्धा गरेका थिए। जसमा कोच प्रमोद खरेलको टिमबाट अनुया र लाक्पा डोल्मा शेर्पा, कोच मिलन नेवारबाट समीक्षा दाहाल र रिन्जिन डोल्मा लामा, कोच छेवाङ लामाबाट द्वितिका प्रधान र छेसाङ तामाङ र कोच मेलिना राईको टिमबाट सिमला धिताल र आयुष लामा थिए।
विजेता तामाङलाई हिमालय टिभीका अध्यक्ष धर्मराज भुसाल, कार्यकारी निर्देशक श्याम कँडेल लगायतले पुरस्कार प्रदान गरे । विजेता बनेसँगै उनले ट्रफीसहित १० लाख रुपैयाँ जितेकी छिन्।
दर्शकले दिएको भोटको आधारमा प्रतिस्पर्धीलाई विजेता चुनिएको हो । ६ देखि १४ वर्षभित्रका बालबालिका सहभागी हुँदै दर्शकको भोटको आधारमा बढी भोट प्राप्त गर्ने प्रतिस्पर्धीलाई विजेता छनोट गरिन्छ।
