काठमाडौं । नेपाली बजारमा सुनको मूल्यमा सामान्य गिरावट आएको छ । आइतबार प्रतितोला तीन हजार रुपैयाँले बढेर नयाँ रेकर्ड बनाएको सुनको मूल्यमा सोमबार तीन सय रुपैयाँले गिरावट आएको हो ।
नेपाल सुनचाँदी व्यवसायी महासंघका अनुसार आज स्थानीय बजारमा सुनको मूल्य प्रतितोला एक लाख ५२ हजार तीन सय रुपैयाँ कायम भएको छ ।
सुनको मूल्यमा सामान्य गिरावट आउँदा आज चाँदीको मूल्य भने स्थिर छ । आइतबारकै मूल्यअनुसार आज चाँदी प्रतितोला एक हजार आठ सय १० रुपैयाँमा कारोबार भइरहेको छ ।
आज अन्तर्राष्ट्रिय बजारमा भने सुन प्रतिऔंस २५ सय ०१ अमेरिकी डलरमा कारोबार भइरहेको छ। जुन अघिल्लो कारोबार दिनको तुलनामा ७ डलरले घटेको हो ।
विशेषगरी मध्यपूर्वमा संकट बढ्दै गर्दा सुनको मूल्यमा तिव्र घटबढ भइरहेको छ । जसको प्रभाव स्वरुप स्थानीय बजारमा सुनको मूल्यले एकपछि अर्को रेकर्ड बनाइरहेको देखिन्छ ।
