काठमाडौं । यही भदौको १४ गतेदेखि प्रदर्शन हुने फिल्म ‘वर एण्ड वधु’को तेस्रो गीत ‘सिरि सिरि हावा’ सार्वजनिक भएको छ ।
मिलन चाम्सको निर्देशनमा निमार्मण भएको फिल्मको बिहीबार सार्वजनिक गीतमा डेब्यु अभिनेता विवेक कर्माचार्य र नायिका आँचल शर्मा फिचर्ड छन् ।
सञ्चारकर्मी नरेश भट्टराईको शब्द रचना तथा युग भुषालको संगीत रहेको गीतमा सुगम पोखरेल र नेहा करोडेको स्वर रहेको छ । रोमान्टिक भावको गीतको अडियो तथा भिडयो उत्कृष्ट बनेको देखिन्छ।
नेपाल र रोमानियाको सुन्दर लोकेशनमा खिचिएको फिल्मको सार्वजनिक गीतमा आँचल र विवेको केमेष्ट्री गजबको देखिएको छ । कविराज गहतराजले कोरियोग्राफी गरेको यस गीतको भिडयोमा उनीहरुको नोकझोंक देखाइएको छ ।
सामाजिक कथावस्तुलाई रमाइलो शैलीमा प्रस्तुत गरिएको फिल्ममा विजय लामा, किरण केसी, हिउँवाला गौतम, सरिता लामिछाने, अन्सु महर्जन, दिनेश काफ्ले, यमन श्रेष्ठ, सृष्टि खड्का, गरिमा शर्मा, रविन्द्र खड्का, कुसुम शर्मा, विजु पार्की, हिमेश पन्त लगायतको पनि अभिनय छ । विवेक र कुसुमको यो डेब्यु फिल्म हो ।
एलआरके प्रोडक्शनको ब्यानरमा निर्माण भएको फिल्ममा जानुका थापा निर्माता र डाक्टर अमित रिजाल कार्यकारी निर्मातामा छन् ।
रोमानियामा र काठमाडौंमा छायांकन गरिएको फिल्ममा सुदिप बरालको छायांकन, प्रदीप भारद्वाजको लेखन छ । फिल्ममा मिलन श्रेष्ठको सम्पादन, साहिल खानको ट्रेलर, हिमाल केसीको एक्सन, रविन्द्र न्यौपाने र अनिस स्याङ्देनको कोरियोग्राफी, सन्तोष लामाको कला निर्देशन, अर्जुन पोखरेलको संगीत छ ।
