काठमाडौं । दिवाकर भट्टराईको निर्देशनमा बनेको फिल्म ‘मायाबी’ आगामी कार्तिक १५ गतेदेखि प्रदर्शनमा आउने पक्का भएको छ। निर्माण पक्षले विशेष गरी तिहारको लक्ष्मीपूजाको अवसर पारेर यो फिल्म रिलिज गर्ने योजना बनाएको छ।
हालसालै मात्र फिल्मको प्रदर्शन मिति तय भएको हो र केही दिनमै यसबारे आधिकारिक घोषणा गरिने जानकारी निर्माण टिमले दिएको छ। लामो समयदेखि निर्माण सम्पन्न भए तापनि प्रदर्शन मिति तय गर्न नसकेको यो फिल्मले अब प्रचार-प्रसारको तयारी थालेको छ।
फिल्म ‘मायाबी’ मा लोकप्रिय नायक पल शाह मुख्य भूमिकामा देखिनेछन्। उनका साथमा दीपिका प्रसाई, करिश्मा श्रेष्ठ, सुशील सिटौला, र समिम खानले पनि प्रमुख भूमिका निर्वाह गरेका छन्।
उक्त मितिमा प्रदीप खड्काको मुख्य भूमिका रहेको अर्को फिल्म ‘एक्टर’ पनि रिलिज हुने पक्का भइसकेको छ ।
बक्स अफिस पल शाह भर्सेस प्रदीप खड्का हुने पक्का भएसँगै अब नेपाली फिल्मका दर्शकहरुका लागि कार्तिक १५ विशेष दिन बन्ने देखिएको छ।
