काठमाडौं । बाढीले पुल भत्काउँदा जाजरकोटको शिवालय गाउँपालिका ६ स्थित खडकदेवी माध्यमिक विद्यालय टुनीबगरको पठनपाठन बन्द छ ।
खोला तर्न नसक्दा विद्यार्थी विगत नौ दिनदेखि विद्यालय जान पाएका छैनन् । विद्यालय जाने बीच बाटोमा रहेको भिउसखोलाको बाढीले पुल भत्काएको हो । विद्यालय आवतजावत गर्न वैकल्पिक बाटो नहुँदा पठनपाठन बन्द गर्नु परेको विद्यालयले जारी गरेको विज्ञप्तिमा उल्लेख छ ।
भिउसखोलामा रहेको ट्रस ब्रिजको एउटा भाग पूरै भत्किएको शिवालय गाउँपालिकाका पूर्वाधार विकास शाखाका इन्जिनियर मनोज केसीले जानकारी दिए ।
“पुल निर्माण गर्न विकास साझेदार निकायसँग समन्वय भइरहेको छ,” उनले भने । विद्यार्थीको पढाइसँगै सर्वसाधारणको आवतजावत नै ठप्प भएको स्थानीयले बताएका छन् ।
प्रतिक्रिया दिनुहोस्
