काठमाडौं । भदौ २८ गतेबाट प्रदर्शनको तयारीमा रहेको फिल्म ‘शाम्बाला’को ट्रेलर सार्वजनिक भएको छ । मंगलबार राजधानीमा आयोजित एक कार्यक्रमका बीच फिल्मको दोस्रो ट्रेलर सार्वजनिक गरिएको हो ।
मीनबहादुर भाम निर्देशित यो फिल्मले लोकार्नो फिल्म फेस्टिभलमा अवार्ड जितेको छ ।
स्वीटजरल्यान्डमा आयोजित ७७ औं लोकार्नो फिल्म फेस्टिभलमा उत्कृष्ट अभिनेत्रीतर्फको अवार्ड जितेको थियो । ‘साम्बाला’की नायिका थिन्ले ल्हामोले उत्कृष्ट अभिनयका लागि ‘बोक्कालिनो डिओर’ अवार्ड जितेकी थिइन् ।
विश्वप्रसिद्ध बर्लिन फिल्म फेस्टिभलमा वर्ल्ड प्रिमियर भएको चलचित्रको ट्रेलरमा हिमाली भेगमा रहेको ट्रेलरमा बहुपतिप्रथा देखाइएको छ । बेपत्ता श्रीमानलाई खोज्न निस्किएकी श्रीमतीको कथा यो फिल्मले भन्नेछ ।
नेपाली र तिब्बती भाषामा रिलिज हुने यो फिल्मलाई नेपालमा अंग्रेजी र नेपाली सबटाइटलमा प्रदर्शन गरिनेछ । सहरी क्षेत्रमा अंग्रेजी सबटाइटलमा देखाइने वितरकले जनाएको छ ।
१४ करोड लगानीमा निर्माण भएको ‘साम्बाला’ नेपालमा भदौ २८ गते रिलिज हुनेछ । मीन भामको यो दोस्रो फिचर फिल्म हो । यसअघि उनले ‘कालो पोथी’ निर्देशन गरेका थिए ।
