काठमाडौं । जितु नेपाल र नीति शाहको शिर्ष भूमिका रहेको फिल्म ‘ज्वाइँ साब’को टिजर सार्वजनिक भएको छ ।
दशैंको फूलपाती अवसर पारेर असोजको २४ गतेदेखि प्रदर्शनमा आउने फिल्मको टिजर रमाइलो र हास्यप्रधान छ।
बसन्त निरौलाले निर्देशन गरेको फिल्मको टिजर कमेडी जनरामा रहेर पनि यसले सामाजिक कथा भन्ने बुझ्न सकिन्छ। टिजरमा मुख्य कलाकार जितुलाई देखाइएको छ भने नीतिलाई भने हात्तीमाथि चढेर बेहुलीको भेषमा सजिएको देखाइएको छ ।
टिजर हेरुन्जेल दर्शकलाई पूर्ण रुपमा मनोरञ्जन दिने देखिन्छ ।
फिल्ममा जितु र नीतिसँगै वुद्दि तामाङ, शिशिर वाङ्देल, प्रकाश घिमिरे, रमेश वुढाथोकी, हिमेश पन्त, निमा पाण्डे, शिवहरि वैरागी, राजेन्द्र नेपाली, कविता आले, शिवु पाण्डे लगायतका कलाकारहरुको अभिनय छ ।
फिल्म रेड आई फिल्म्सको प्रस्तुति, ओएसआर डिजिटल र मौसम फिल्मस्को सहकार्यमा निर्माण भएको फिल्ममा सौगात पण्डित, मीनादेवी खड्का र पदम तामाङको लगानी रहनेछ । फिल्मका कार्यकारी निर्माता विजय बस्याल हुन् । यो फिल्ममा सविन अधिकारीको कथा र शंकर धितालको पटकथा तथा संवाद हुनेछ ।
फिल्ममा श्याम तामाङको डीओपी, अर्जुन पोखरेल र महेश ताम्राकारको संगीत छ ।
यो फिल्मलाई काठमाडौंमा रिच इन्टरटेन्मेन्ट, एप्पल इन्टरटेन्मेन्ट र मोफसलमा एफडी कम्पनीले वितरण गर्नेछ ।
