काठमाडौँ । अशोक थापा मगरको निर्देशनमा बनेको फिल्म ‘खुस्मा’को गीत ‘रुकुम मैकोट’ युट्युब ट्रेन्डिङमा परेको छ ।
अभिनेता धिरज मगर र अभिनेत्री उपासना सिंह ठकुरीको मुख्य भुमिका रहेको फिल्मको यो गीत ‘रुकुम मैकोट’ गत आइतबार एक कार्यक्रमका बीच सार्वजनिक गरिएको थियो । जुन अहिले युट्युब ट्रेन्डिङको म्युजिक सेक्सन अर्न्तगत आठ नम्बरमा पुगेको छ ।
असोज ३ गते संविधान दिवसको अवसर पारेर प्रदर्शनमा आउन लागेको फिल्मको गीतलाई दर्शकले रुचाएका छन् भने यो गीतलाई अहिलेसम्म तीन लाख ८८ हजार ६ सय ७० भ्युज पाएको छ ।
फिल्मका यसअघि सार्वजनिक गीत र टिजरलाई दर्शकले रुचाएका छन् भने ‘रुकुम मैकोट’ गीत हेर्ने धेरै दर्शकले धिरज र उपासनाको केमेष्ट्री गजव देखिएको भन्दै सार्वजनिक गीतलाई अधिकांशले उत्कृष्ट भनेका छन् । २० हजार लाइक गरेको गीतलाई करिब १३ सयले प्रतिक्रिया दिएका छन् ।
एम मिडिया प्रालिको ब्यानरमा निर्माण भएको फिल्ममा धिरज र उपासनाका अलवा माओत्से गुरुङ, खड्क बहादुर पुन (खबपु), सुजाता राई, विजय सुब्बा, राज थापा काउचा, अस्तित्व भट्टचन, संगीता थापा मगर, अरुन मगर, सारा राई, श्वेता मिश्र, विवेश मगर लगायतका कलाकारको अभिनय रहेको छ ।
फिल्मका लेखक निर्देशन थापा मगर स्वयं हुन् । उनले यसअघि केही डकुमेन्ट्री सिनेमा लेखन तथा निर्देशन गरेपनि यो नै ठुलो पर्दाको पहिलो निर्देशकिय फिल्म हो । डकुमेन्ट्री फिल्मबाट निर्देशक थापाले नौ वटा बिभिन्न अन्र्तराष्ट्रिय फिल्म महोत्सवबाट आवार्ड प्राप्त गरिसकेका छन् ।
फिल्मको निर्मातामा विर बहादुर लामा, चन्द्र बहादुर भट्टचन, मान बहादुर धनाह मगर र बेतान मगर छन्, भने सह-निर्माता सुस्मिता बुढाथोकी हुन् । फिल्ममा दिपक बज्राचार्यको छायांकन रहेको छ ।
मगर समुदायको परिवेशमा निर्माण भएको प्रेमकथामा आधारित फिल्मले जनयुद्धको प्रभावका बीच अंकुराएको प्रेमलाई पर्दामा देखाउने छ । एसडी योगी र छान्जु पार्क (कोरियन)को संगीत, सुरेन्द्र राना, राम अविरल बिष्ट र निर्देशक थापा मगरको गीत रचना रहेको छ । फिल्मको वितरण गोविन्द शाहीको काफिया फिल्मस्ले गर्नेछ ।
