काठमाडौं । कथा वाचकको रुपमा ख्याती कमाएका साईग्रेस पोखरेल फिल्म ‘जेरीः अन टप’मा जोडिएका छन्। नायक अनमोल केसीको मुख्य भूमिका रहने फिल्मको क्रिएटिभ भूमिकाको लागि साइग्रेस जोडिएका हुन् ।
बिहीबार फिल्मको निर्माण टिम र साईग्रेसबीच कागजी सम्झौता भएको हो ।
सुयोग गुरुङको निर्देशनमा बन्न लागेको फिल्ममा साईग्रेस जोडिएसँगै निर्माता सरोज न्यौपानेले फिल्मको कथा अझै मजबुत बन्ने बताएका छन् ।
उनले भने, ‘उहाँले हाम्रो स्क्रिप्टलाई परिमार्जित र थप मजबुत बनाउनुहुनेछ। उहाँलाई स्क्रिप्ट डाक्टर त भन्न मिल्दैन, तर उहाँजस्तो व्यक्तिले हाम्रो स्क्रिप्टमा आफ्नो सिर्जना थप्दा फिल्म अझ उत्कृष्ट हुनेछ भन्ने विश्वास छ।’
फिल्ममा जोडिन पाउँदा साईग्रेस पोखरेल पनि निकै उत्साहित छन्। उनले लामो समयदेखि अनमोल केसीलाई फलो गर्दै आएको बताउँदै, अनमोल पनि साईग्रेस फिल्ममा सहभागी हुँदा उत्साहित देखिएका छन्।
यो फिल्मको छायांकन असोजदेखि सुरु हुनेछ। फिल्मलाई काठमाडौं, लुक्ला, र लद्दाखमा छायांकन गर्ने योजना निर्माण पक्षको छ। यस फिल्ममा अनमोल केसी, आँचल शर्मा, र जसिता गुरुङले मुख्य भूमिका निभाउनेछन्।
निर्माण पक्षले ‘जेरीः अन टप’लाई भ्यालेन्टाइन्स डेमा अर्थात् फागुन २ गते गतेबाट प्रदर्शनमा ल्याउने घोषणा गरिसकेको छ।
