काठमाडौँ । दयाहाङ राई र आँचल शर्मा स्टारर फिल्म ‘दुःखी आत्मा’को सुटिङ सुरु भएको छ । दीपेन्द्र लामाको लेखन, निर्देशन रहेको फिल्म गत सोमबारदेखि सुटिङ भइरहेको छ ।
सुटिङ सुरु भएसँगै ‘दुःखी आत्मा’को सेटबाट दयाहाङ र आँचलको तस्विर बाहिरिएको छ । हिमाल कडरिया निर्माता रहेको फिल्ममा दयाहाङ र आँचलका साथमा अनुपविक्रम शाही, बुद्धि तामाङ, पुस्कर गुरुङ, कविता आले, शिशिर वाङ्देल, आशान्त शर्मा, लोकेन्द्र लेखक, अंकित खड्का, लुनिभा तुलाधर, आरती आचार्य, निमा पाण्डे, इंगीहोपो कोइच सुनुवार, यासेली योङहाङलगायतले अभिनय गर्दै छन् ।
पूरा फिल्म काठमाडौँ उपत्यका सेरोफेरोमा खिचिने निर्देशक लामाले जानकारी दिए । निर्माता कडरियाले आफूहरुले फिल्म भरपुर मनोरञ्जक बनाउन कसर बाँकी नराख्ने बताए ।
निर्देशक लामा र निर्माता कडरियाले यसअघि निर्माण गरेको ‘नाङ्गो गाउँ’ सुपरहिट भएको थियो । क्लक वर्क क्रिएसन्सको ब्यानरमा रहेको ‘दुःखी आत्मा’ सोसियल कमेडी फिल्म हो ।
आलोक शुक्लाको छायांकन, सुशान्त गौतमको संगीत र रामजी लामीछानेको कोरियोग्राफी रहेको फिल्मको प्रोडक्शन म्यानेजर सुदीप ढकाल छन् । आरआर फिल्मस्ले वितरण गर्ने फिल्मको रिलिज मिति सुटिङ सकिएपछि मात्रै तय गरिने जानकारी निर्माता कडरियाले दिए ।
