काठमाडौं । दसैंको फूलपातीको अवसर पारेर असोज २४* मा तीन नेपाली फिल्म ‘छक्का पञ्जा ५’, ‘१२ गाउँ’ र ‘ज्वाइँ साब’ रिलिज भएका थिए । फिल्म ‘ज्वाइँ साब’ शो र कमाइमा केही पछि हुँदा ‘छक्का पञ्जा ५’ र ‘१२ गाउँ’बिच बक्सअफिसमा बलियो प्रतिस्पर्धा चलिरहेको छ ।
हिट फ्रेन्चाइज ‘छक्का पञ्जा ५’ले रिलिज मितिदेखि नै बक्सअफिस तताइरहेको छ भने ‘१२ गाउँ’ पनि ‘छक्का पञ्जा ५’लाई भेट्याउँदै अघि बढेको छ ।
शुक्रबारसम्म आउँदा काठमाडौं उपत्यकाका क्यूएफएक्समा ‘१२ गाउँ’ र ‘छक्का पञ्जा ५’ शोमा करिब बराबर देखिन्छन् भने उपत्यका बाहिर पनि दुवैले बराबरी शो पाएका छन् ।
बुधबारसम्मको बक्स अफिस कलेक्सनलाई हेर्दा, ‘छक्का पञ्जा ५’ कमाइमा केही अगाडि छ । वितरक मनोज राठीले बताएअनुसार ‘छक्का पञ्जा ५’ले बुधबारसम्म बक्सअफिसबाट ११ करोड ५० लाख रुपैयाँ ग्रस कलेक्सन गरेको छ ।
यता ‘१२ गाउँ’ले पनि कमाई १० करोड नघाएको छ । बुधबारसम्म ‘१२ गाउँ’को कमाई १० करोड ५ लाख रुपैयाँ भएको वितरक विनोद शाहीले जानकारी दिए ।
दुवै फिल्मले शुक्रबार पनि बक्स अफिसमा आक्रामक व्यापार गरिरहेका छन् । जसलाई हेर्दा, आगामी समयमा दुवैले नयाँ रेकर्ड बनाउने सम्भावना छ ।
नाेट : यसअघि मितिमा अन्यथा भएकाेमा सच्चाइएकाे छ । सं.
