काठमाडौं । स्थानीय बजारमा सुनको मूल्यले दिनदिनै रेकर्ड राखिरहेको छ । दसैंपछिका प्रत्येक कारोबार दिनमा निरन्तर बढिरहेको सुनको मूल्यले एकपछि अर्को रेकर्ड बनाइरहेको हो ।
नेपाल सुनचाँदी व्यवसायी महासंघका अनुसार निरन्तर बृद्धिका बिच साताको तेस्रो कारोबार दिन मंगलबार स्थानीय सुनको मूल्य प्रतितोला एक लाख ६५ हजार नौ सय रुपैयाँ पुगेको छ । जुन सोमबारको तुलनामा तीन सय रुपैयाँले बढी भएको महासंघले जनाएको छ ।
यसअघि सोमबार सुनको मूल्य प्रतितोला एक लाख ६५ हजार छ सय रुपैयाँ थियो । मंगलबारको मूल्य हालसम्मकै उच्च हो ।
महासंघले जनाएअनुसार पछिल्लो कात्तिक महिनाको छ दिनमा मात्रै सुनको मूल्यमा तीन हजार पाँच सय रुपैयाँले बढोत्तरी भएको छ । कात्तिक १ मा सुनको मूल्य प्रतितोला एक लाख ६२ हजार चार सय रुपैयाँमा किनबेच भएको थियो ।
सुनको मूल्यले एकपछि अर्को रेकर्ड बनाइरहँदा स्थानीय बजारमा चाँदीको मूल्यले पनि नयाँ–नयाँ रेकर्ड बनाइरहेको छ । निरन्तर बृद्धिका बिच मंगलबार चाँदी प्रतितोला दुई हजार एक सय रुपैयाँ पुगेको छ । जुन हालसम्मकै उच्च मूल्य हो ।
सोमबारको तुलनामा चाँदीको मूल्यमा प्रतितोला पाँच रुपैयाँले बृद्धि भएको महासंघले जनाएको छ ।
आज अन्तराष्ट्रिय बजारमा सुनको मूल्य प्रतिऔंश २७३३.७७ डलरमा किनबेच भइरहेको छ ।
