काठमाडौँ । तिहार नजिकिएसँगै मखमली फूलको पकेट क्षेत्र मानिने भक्तपुरको गुण्डुका किसानहरू फूल टिप्न र माला गाँस्न व्यस्त भएका छन् ।
तिहार आउन एक साता बाँकी हुँदा गुण्डुका किसानहरू मखमली फूलको माला बनाएर बिक्रीका लागि तयारी अवस्थामा राख्न व्यस्त भएका हुन् । भक्तपुरमा २० वर्षभन्दा बढी समयदेखि मखमली फूल उत्पादन हुँदै आएको छ ।
वर्षेनी मखमली फूलको खेती हुँदै आएका गुण्डुमा फूल खरिद गर्न व्यापारीहरू खेतबारीमा पुग्ने गरेको किसानहरूको भनाइ छ । उपत्यकामा खपत हुने धेरै मखमली फूल गुण्डु क्षेत्रकै उत्पादन भएको किसानहरू बताउँछन् ।
केही किसानले विदेशसमेत मखमली फूल निर्यात गर्ने गरेका छन् । दाजुभाइ र दिदीबहिनीको पर्व मानिने तिहारमा कहिल्यै नओइलाउने मखमली फूलको विशेष महत्व हुँदै आएको छ । दिदीबहिनीले दाजुभाइलाई भाइ टीका लगाएपछि मखमली माला पहिराउने परम्परा रहदै आएको छ ।
