काठमाडौँ । काठमाडौँमा जारी साफ महिला च्याम्पियनसिप २०२४ को उपाधि भिडन्तमा आज नेपाल र बंगलादेशबीच प्रतिस्पर्धा हुँदैछ ।
दशरथ रंगशालामा साँझ साढे ६ बजे फाइनल खेल हेर्न प्रधानमन्त्री केपी शर्मा ओलीसमेत जाने भएका छन् । उपाधि विजेतालाई उनले पुरस्कार वितरण गर्ने कार्यक्रम छ ।
अपराजित यात्रामा रहेको नेपालले भारतलाई पेनाल्टीमा ४-२ ले हराएको थियो । बंगलादेशले भुटानलाई ७-१ गोलले हराउँदै फाइनलमा स्थान बनाएको थियो ।
नेपाल बलियो प्रतिद्वन्द्वी बंगलादेशलाई पराजित गर्दै पहिलो पटक च्याम्पियनसिपको उपाधि जित्ने मनोबलका साथ मैदानमा उत्रिने भएको छ । यसअघि नेपाल पाँच पटक फाइनलमा पुगेको थियो ।
जसमा नेपाल भारतसँग चार पटक र बंगलादेशसँग एक पटक पराजित हुँदै उपाधि गुमाएको थियो । नेपाली राष्ट्रिय महिला फुटबल टोलीका मुख्य प्रशिक्षक राजेन्द्र तामाङले विगतका गल्ती नदोहोर्याउने बताएका छन् ।
