काठमाडाैं । अल्लु अर्जुन अभिनित बहुप्रतिक्षित फिल्म ‘पुष्पा २’ को नयाँ रिलिज मिति सार्वजनिक भएको छ । यसअघि फिल्म ६ डिसेम्बरमा रिलिज हुने तय भएपनि अल्लु अर्जुनले इन्स्टाग्राममा पोस्ट गर्दै नयाँ रिलिज मितिको खुलासा गरेका हुन् ।
अल्लु अर्जुनले केही समय अगाडि ‘पुष्पा २’को पोस्टर सेयर गर्दै नयाँ मितिको खुलासा गरेका छन् । यस पोस्टरमा अल्लु अर्जुन मुखमा चुरोट र हातमा पिस्ताेल लिएर उभिएको देखिन्छ ।
पोष्टको क्याप्सनमा अभिनेताले ह्यासट्याग प्रयोग गर्दै लेखेका छन्, ‘पुष्पा २’ डिसेम्बर ५ मा आउँदैछ।
सन् २०२१ मा आएको पुष्पा फ्रेन्चाइजीको दोस्रो भाग यसअघि ६ डिसेम्बर २०२४ मा रिलिज हुने तयारी गरिएकाे थियाे । तर, अब यसमा परिवर्तन गरिएको छ र निर्धारित रिलिज मितिभन्दा १ दिन अगाडि अर्थात् डिसेम्बर ५ मा रिलिज हुनेछ ।
निर्माताको यो निर्णयले फिल्मलाई फाइदा हुन सक्छ किनभने फिल्म ६ गते रिलिज भएको भए साताको एक दिन अगाडि मात्रै पाइन्थ्यो तर, फिल्म शुक्रबारको सट्टा डिसेम्बर ५ गते बिहीबार रिलिज हुनेछ ।
चलचित्रको ट्रेलर सार्वजनिक भएदेखि नै दर्शकमाझ चलचित्रको क्रेज छ । फिल्ममा अल्लु अर्जुन–रश्मिका मन्डन्ना मुख्य भूमिकामा देखिनेछन् । यसका साथै फिल्ममा फहद फासिल पनि महत्वपूर्ण भूमिकामा देखिनेछन् । प्रियामणि, सृतेज र अनुसया भारद्वाज पनि फिल्ममा छन् ।
पुष्पा (2021) ले बक्स अफिसमा 300 करोड भारु कमाएको थियो। रिलिज अगावै आउँदै गरेको ‘पुष्पा २’ को बक्स अफिसको तथ्यांकले फिल्मले सुनामी ल्याउने संकेत गरेको छ ।
फिल्मले रिलिज हुनुअघि नै आन्ध्र प्रदेश र तेलंगानामा प्रि–बिजनेस गरी २२० करोड रुपैयाँ कमाइसकेको छ । यसले उत्तर भारतमा 200 करोड, कर्नाटकमा 30 करोड, केरलामा 20 करोड, तमिलनाडुमा 50 करोड र अन्तर्राष्ट्रिय बजारमा 150 करोड रुपैयाँ कमाएको छ।
