कोलेस्ट्रोल हाम्रो शरीरको लागि अत्यावश्यक तत्व हो, तर यदि यसको मात्रा सामान्यभन्दा बढी भयो भने यो रक्त धमनीहरूमा जम्मा हुन्छ। जसका कारण मुटुरोग, स्ट्रोक र मुटुसँग सम्बन्धित रोगको जोखिम बढ्न सक्छ ।
त्यसैले कोलेस्ट्रोलको मात्रालाई नियन्त्रणमा राख्नु अति आवश्यक हुन्छ । कोलेस्ट्रोल नियन्त्रण गर्न केही औषधि प्रभावकारी हुन्छन् तर, औषधिबाहेक राम्रो खानपान र नियमित व्यायाम पनि धेरै महत्त्वपूर्ण हुन्छ।
धेरै तरकारीहरू शरीरमा खराब कोलेस्ट्रोल कम गर्न धेरै प्रभावकारी हुन सक्छ।
विज्ञहरूले बताएअनुसार केही तरकारी खाँदा कोलेस्ट्रोलको स्तर सन्तुलनमा ल्याउन सकिन्छ। फाइबर, एन्टिअक्सिडेन्ट र शक्तिशाली यौगिकहरू पाइने तरकारी खाँदा शरीरबाट खराब कोलेस्ट्रोल हटाउन मद्दत मिल्छ।
फाइबरले खराब कोलेस्ट्रोललाई अवशोषित हुनबाट रोक्छ र शरीरबाट निकाल्छ। टमाटर, पालक, ब्रोकाउली, गाजर जस्ता सागसब्जीको सेवनले उच्च कोलेस्ट्रोल नियन्त्रण गर्न र मुटुको स्वास्थ्यलाई बढाउन मद्दत गर्छ।
नसामा जमेको कोलेस्ट्रोल हटाउने यी ५ तरकारी !
पालक – पालक हरियो पात भएको तरकारी हो, जसमा फाइबर, एन्टिअक्सिडेन्ट र भिटामिन प्रशस्त मात्रामा पाइन्छ । यसमा पाइने फाइबरले शरीरमा कोलेस्ट्रोलको मात्रा घटाउन मद्दत गर्छ ।
यसका अलावा पालकमा पोटासियम र म्याग्नेसियम पनि पाइन्छ, जसले रक्तचाप नियन्त्रण गर्न मद्दत गर्छ। यो एन्टिअक्सिडेन्ट र एन्टी-इन्फ्लेमेटरी गुणले भरिपूर्ण तरकारी हो, जसले मुटुको स्वास्थ्यलाई पनि सुधार गर्न सक्छ।
ब्रोकाउली – ब्रोकाउली जति स्वादिलो छ त्यति नै स्वास्थ्यका लागि पनि फाइदाजनक छ । ब्रोकाउलीमा सल्फोराफेन नामक यौगिक हुन्छ, जसले शरीरमा खराब कोलेस्ट्रोल घटाउन मद्दत गर्छ।
यो कम्पाउन्ड मुटु र रक्तनलीलाई स्वस्थ राख्नको लागि चिनिन्छ। ब्रोकाउलीमा पाइने फाइबरले रगतबाट खराब कोलेस्ट्रोल हटाउन मद्दत गर्छ। यसबाहेक ब्रोकाउलीमा भिटामिन सी र के पनि पाइन्छ, जसले प्रतिरक्षा प्रणालीलाई बलियो बनाउँछ र धेरै रोगहरूबाट बचाउँछ।
टमाटर – टमाटरमा लाइकोपीन नामक शक्तिशाली एन्टिअक्सिडेन्ट पाइन्छ, जसले कोलेस्ट्रोलको मात्रा घटाउन मद्दत गर्छ। धेरै अनुसन्धानले टमाटरको सेवनले खराब कोलेस्ट्रोल र ट्राइग्लिसराइड्सको स्तर कम हुने देखाएको छ ।
टमाटरमा फाइबर पनि हुन्छ, जसले कोलेस्ट्रोल नियन्त्रण गर्न मद्दत गर्छ। यसबाहेक टमाटरलाई मुटुको स्वास्थ्य बढाउन पनि निकै प्रभावकारी मानिन्छ । यसको जुस पिउनु पनि कोलेस्ट्रोलका बिरामीका लागि फाइदाजनक हुन्छ ।
गाजर – गाजर खाँदा उच्च कोलेस्ट्रोलबाट पनि धेरै हदसम्म राहत मिल्छ । गाजरमा बायोएक्टिभ कम्पाउन्ड र फाइबर हुन्छ, जसले कोलेस्ट्रोललाई शरीरमा अवशोषित हुनबाट रोक्छ र यसलाई हटाउन मद्दत गर्छ।
यसका अलावा गाजरमा भिटामिन ए प्रशस्त मात्रामा पाइन्छ, जुन आँखा र छालाको स्वास्थ्यका लागि पनि फाइदाजनक हुन्छ । गाजरलाई सादा वा सलादको रूपमा पनि खान सकिन्छ।
लौका – लौका शरीरको लागि धेरै लाभदायक तरकारी हो। यसमा प्रचुर मात्रामा पानी र फाइबर हुन्छ, जसले पेट सफा गर्न र कोलेस्ट्रोलको स्तर नियन्त्रण गर्न मद्दत गर्छ।
कोलेस्ट्रोल घटाउनुका साथै तौल घटाउनमा पनि लौका उपयोगी हुन्छ । यसको सेवनले शरीरभित्र जम्मा भएका विषाक्त पदार्थ बाहिर निस्कन्छ, जसले मुटुको स्वास्थ्यमा सुधार गर्छ । लौका बाहेक, कद्दूको सेवनले कोलेस्ट्रोल घटाउन पनि मद्दत गर्दछ। एजेन्सीबाट
