काठमाडौं । दुई दिनको लगातार बृद्धिपछि साताको तेस्रो कारोबार दिन (मंगलबार) सेयर बजार परिसूचक (नेप्से) घटेको छ । मंगलबार ११.२४ अंकले घट्दै नेप्से २७४८.९६ को बिन्दुमा ओर्लिएको छ ।
परिसूचक घट्दै गर्दा मंगलबार कारोबार रकम पनि घट्यो । एक करोड ६७ लाख ८६ हजार कित्ता सेयर किनबेच हुँदा कारोबार रकम ७ अर्ब ८५ करोड ५९ लाख रुपैयाँमा सीमित भयो ।
यसअघि आइतबार १० अर्बमाथिको कारोबार भएको नेप्सेमा सोमबार ११ अर्बमाथिको कारोबार भएको थियो ।
दोहोरो अंकले नेप्से घट्दै गर्दा आज अधिकांश समूहको सूचकमा गिरावट आयो । १३ समूहमध्ये फाइनान्स, निर्जिवन बीमा र व्यापारको सूचक बढ्दा बाँकी सबै समूहको सूचक घटे । मंगलबार सबैभन्दा बढी अन्यको सूचक १.१८ प्रतिशतले बढ्यो ।
कारोबारमा आएका २४४ कम्पनीमध्ये ८० को मूल्य बढ्यो भने १५७ को मूल्य घट्यो । ७ कम्पनीको भने मूल्य स्थिर रह्यो ।
दोहोरो अंकले परिसूचक घटेपनि चार कम्पनीको मूल्य भने सकारात्मक सर्किट लेबलमा बढ्यो ।
आज कारोबार रकमका आधारमा गुडविल फाइनान्स, वेस्ट फाइनान्स, अनु खोलालगायत शीर्ष स्थानमा रहे । गुडविल फाइनान्सको मात्रै २९ करोड २८ लाख रुपैयाँको सेयर किनबेच भयो ।
छठ बिदापछि सेयर बजार लगातार दुई दिन बढेको थियो । उच्च अंकले नेप्से बढ्दै गर्दा कारोबार रकम पनि उत्साहपूर्णरुपमा बढेको थियो ।
मंगलबारको गिरावटलाई करेक्सनको रुपमा लिन सकिन्छ । दुई दिनको बृद्धिमा लाभ उठाउनेहरु सक्रिय हुँदा नेप्से घटेको बजारका जानकारहरुको बुझाई छ ।
