काठमाडौं। यतिबेला नेपाली फिल्म क्षेत्र निकै फस्टाई रहेको छ । दसैँको भन्दा केही समय अघिदेखि अहिलेको समयलाई हेर्ने हो भने नेपाली फिल्मले हिन्दी फिल्मलाई समेत टिक्न नसक्ने गरी पछि पार्दै अघि बढिरहेको छ ।
यही बिच लामो समयसम्म पर्दा पछि रहेका कुनै समयका स्टारहरू भटाभट नेपाली फिल्ममा कमव्याक गर्न थालेका छन् । अभिनेत्री बिपना थापाले १६ वर्षपछि फिल्म ‘ह्रस्वदीर्घ’बाट कमव्याक गर्दा ऋचा घिमिरे ‘तेलभिसा’बाट कमव्याक गर्दैछिन् ।
यता, दिलिप रायमाझी पनि छोरीलाई फिल्ममा डेव्यु गराउँदै अब आफू पनि फिल्ममै समर्पित हुने बताउँछन् ।
बिराज भट्टले आफैले सिनेमा बनाएर ओझिलो कमव्याक मात्रै गरेनन् समीर भट्टलाई पनि उच्च सफलता दिलाए । यसरी विराजको धमाकेदार कमव्याक भइरहँदा कति दर्शकले नेपालकै चर्चित एक्सन अभिनेता निखिलको पनि कमव्याक चाहे ।
‘१२ गाउँ’ हिट भए पनि कति दर्शकले नेपाली चलचित्र उद्योगकै उत्कृष्ट एक्सन अभिनेता एवम् स्टन्टकर्ताका रूपमा चिनिने निखिलको पनि एक्सन हेर्न खोजे । जुन चाहनाकै बिच निखिल फर्किने तयारीमा लागेको देखिन्छ ।
उसो त निखिलले केही अन्तरवार्तामा आफ्नै होम प्रोडक्सन बाट अल्ट्रा हाई टेक सिनेमा बनाउने भनेका थिए तर अहिले भने उनी उक्त कामलाई थाँती राख्दै अरूकै ब्यानरबाट कमव्याक गर्ने निर्णयमा पुगेका छन् । उनी सुवर्ण थापाले निर्देशन गर्ने फिल्म ‘महागठबन्धन’ नामक चलचित्रबाट कमव्याक गर्ने भएका हुन् । जसको कथा ब्रजिस खनालले लेख्दैछन् भने यसमा निखिलको जोडी भएर अहिलेकी हिट नायीका बर्षा सिवाकोटि देखिने भएकी छिन् ।
वर्षा हालसालै रिलिज भएको फिल्म छक्का पन्जा पाँचका कारण निकै चर्चामा छिन् यस्तोमा अब उनी फेरी एक्सन स्टार निखिल उप्रेती सँग काम गर्ने भएकी छिन् । निखिल र वर्षा सँगै कलाकार निर्मल शर्मा पनि जोडिइएको फिल्मको बारेमा अन्य जानकारी भने प्राप्त हुन बाँकी नै छ ।
