काठमाडौँ । नेपाल प्रिमियर लिग (एनपीएल)को तेस्रो खेलमा जनकपुर बोल्ट्सले कर्णाली याक्समाथि शानदार जित निकालेको छ । कर्णालीले दिएको १४२ रनको लक्ष्य जनकपुरले १५.१ ओभरमा दुई विकेट गुमाएर पूरा गरेको हो ।
जनकपुरका कप्तान अनिल शाहले ६२ रनको अर्धशतकीय इनिङ खेले । अनिल र आसिफ शेखले जनकपुरको पहिलो विकेटका लागि ८४ रनको साझेदारी गरे । आसिफ ३६ रनमा आउट भए । लाहिरू मिलन्थाले २४ रन जोडे । जिमी निशम १६ रनमा अविजित रहे ।
बलिङमा कर्णालीका मौसम ढकाल र जिशन मक्सुदले एक-एक विकेट लिए ।
त्यसअघि जनकपुरविरुद्ध टस जितेर पहिला ब्याटिङ गरेको कर्णालीले निर्धारित २० ओभरमा ७ विकेट गुमाउँदै १४१ रन बनायो ।
कर्णालीका कप्तान सोमपाल कामी र अर्जुन घर्तीले आक्रामक ब्याटिङ गरे । सोमपाल १३ बलमा २९ रनमा अविजित रहे । अर्जुनले २२ बलमा ३३ रन बनाउँदा गुल्सन झाले ३६ रन बनाए ।
भारतीय चर्चित खेलाडी शिखर धवनसहित कर्णालीका सबै खेलाडी फ्लप भए । यसअघि शनिबार भएको पहिलो खेलना जनकपुरले विराटनगर किंग्सलाई ८ विकेटले पराजित गरेको थियो ।
