काठमाडौं । कीर्तिपुरको मेयर पदका लागि भएको उपनिर्वाचनमा नेपाली कांग्रेसका उम्मेदवार कृष्णमान डंगोल नै विजयी भएका छन् । उनले ५ हजार ३३४ मत पाएर जित हासिल गरेका हुन् ।
उनका निकटतम प्रतिद्वन्द्वी नेकपा (माओवादी केन्द्र)का शिवशरण महर्जनले ४ हजार ५५५ मत पाए । महर्जनले पाएको मत डंगोलले पाएको मतभन्दा ७७९ ले कम हो ।
कीर्तिपुरको अन्तिम नतिजामा नेकपा (एमाले)का सुरेन्द्र मानन्धर भने तेस्रो बने । मानन्धरले ४हजार ३३७ मत पाए ।
स्वतन्त्र उम्मेदवार राजमान महर्जनले २ हजार ३६ मत, स्वतन्त्र उम्मेदवारहरू कविकुमार महर्जनले १ हजार ३१४ मत र दिनेशकुमार अधिकारीले १ हजार ४८ मत पाएका हुन्।
२०७९ मा भएको निर्वाचनमा कीर्तिपुरको मेयर पदमा कांग्रेसका राजकुमार नकर्मी विजयी बनेका थिए। उनले ९ हजार ४३ मत प्राप्त गरेका थिए। यद्यपि, यसपटक कांग्रेसको निकै मत खस्कियो । डंगोलले निकै सकससहित हात पारे ।
सँगै कीर्तिपुरमा नेकपा (एमाले)ले आफ्नो हैसियत गुमायो ।
